Sıfrlyq platforma iske qosyldy
Indýstrıa jáne ınfraqurylymdyq damý mınıstri Qaıyrbek Óskenbaev Prezıdent tapsyrmalarynyń oryndalý barysy jaıly aıtyp berdi, dep habarlaıdy Almaty-akshamy.kz.
«Ózderińizge málim, bıyl shilde aıynda Memleket basshysy Qasym-Jomart Toqaev Úkimettiń keńeıtilgen otyrysynda bizdiń mınıstrlikke «QazAvtoJol» men «Kazahavtodordy» biriktirip, birtutas avtojol kompanıasyn qurýdy tapsyrǵan bolatyn. Prezıdent tapsyrmasyn júzege asyrý maqsatynda biz atalǵan eki jol operatoryn biriktirý boıynsha Úkimet qaýlysynyń jobasyn daıyndap, ol Úkimet músheleri tarapynan qoldaý tapty. Osylaısha, «QazAvtoJol» men «Kazahavtodor» birtutas jol kompanıasyna biriktirildi. Búgin eki jol operatoryn qosý jumysy bastaldy. Taıaý arada atalǵan kompanıalardyń oblystyq fılıaldarynyń ákimshilik-basqarý personalyn qysqartý jolymen biriktirý josparlanǵan», - dep jazdy mınıstr Telegram paraqshasynda.
Onyń aıtýynsha, jyl basynan beri Prezıdenttiń mınıstrlikke júktegen 95 tapsyrmasy oryndalǵan.
Birinshiden, halyqtyń áleýmettik jaǵynan az qamtylǵan tobyna jaldamaly turǵyn úıdi sýbsıdıalaýǵa arnalǵan ótinim qabyldaıtyn sıfrlyq platforma iske qosyldy. Atalǵan platforma arqyly azamattar tarapynan 32 myńǵa jýyq ótinim kelip túsip, onyń 8 myńǵa jýyǵy maquldanǵan.
Ekinshiden, qalalardyń keshendi qurylysynyń jańa standarty qabyldandy. Atalǵan qujat qalalyq jerde ómir súrý ortasy men turǵyn úıge qatysty qolaıly jaǵdaı jasaýdy kózdeıdi.
Úshinshiden, «E-shańyraq» aqparattyq júıesi iske qosyldy. Aqparattyq júıeni jasaý barysynda salanyń bytyrańqy aqparattyq júıelerin biriktiretin turǵyn úı komýnaldyq sharýashylyqtyń sıfrlyq júıesin qurýǵa basymdyq berildi.
Bul júıe aýqymdy aqparattardy taldaý esebinen tıimdi basqarý sheshimin qabyldaýǵa múmkindik beredi degen senimdemin. Joba memlekettik-jekemenshik áriptestik tetigi boıynsha búdjettik qarjylandyrýsyz iske asyryldy.
Tórtinshiden, bıyl arnaıy ekonomıkalyq aımaqtardyń tıimdiligin arttyrýǵa jáne AEA basqarýshy kompanıalarynyń kadrlyq quramyn nyǵaıtýǵa arnalǵan Jol kartasy qabyldandy. Bul qujat arqyly biz arnaıy ekonomıkalyq aımaqtardyń qyzmetin reformalaý sharalaryna basymdyq berdik.
Besinshiden, halyqaralyq júk tasymalyn damytý úshin uıymdastyrý is-sharalarynyń jospary ázirlendi. Atalǵan qujat elimizdiń tranzıttik áleýetin arttyrýǵa tyń serpin beredi dep oılaımyz.
Altynshydan, avtokólik quraldary men aýyl sharýashylyǵy tehnıkalaryn shyǵaratyn otandyq zaýyttarǵa keń kólemdegi tekserý jumystary aıaqtaldy. Árbir kásiporynǵa jan-jaqty taldaý júrgizilip, anyqtalǵan kemshilikterdi túzetý boıynsha tıisti usynystar berildi.
Jetinshiden, sońǵy úsh jylda salynǵan úılerge revızıa júrgizilip, esep pen naqty istiń shynaıylyǵy tekserildi. Atap aıtqanda, 2019-2021 jyldary aralyǵynda elimizde 45,5 mln sharshy metr turǵyn úı paıdalanýǵa berilgen. Jergilikti atqarýshy organdar bergen aqparat boıynsha geoportalǵa engizilgen turǵyn úı kólemi 43,3 mln sharshy metrdi quraıdy. Onyń 83 paıyzy tekseris barysynda rastaldy. Al qalǵan 17 paıyz baspana paıdalanýǵa berý týraly aktiniń joq bolýyna, qurylystyń aıaqtalmaýyna jáne jer ýchaskesin maqsatsyz paıdalanýǵa baılanysty rastalmady.
Segizinshiden, ROP operatorynyń qarajatyn paıdalana otyryp, otandyq aýyl sharýashylyǵy tehnıkasyn satyp alýǵa arnalǵan jeńildetilgen nesıe berý tetigin engizý mehanızmi iske qosyldy. Osylaısha, ózdiginen júretin aýyl sharýashylyǵy tehnıkalaryn jańartý baǵytynda 30 mlrd teńge (aralas kózder arqyly tartylatyn qarajatty qosa eseptegende – 40 mlrd teńge) bólindi. Sonymen qatar búginde otandastarymyz jeńildetilgen avtonesıe baǵdarlamasyna da qatysýda.
«Memleket basshysynyń barlyq tapsyrmasy erekshe baqylaýymyzda jáne der kezinde oryndalyp jatyr» dep atap ótti Qaıyrbek Óskenbaev.