Qazir Eýrokomıssıa Shengenge tirkelý úshin alymdy 12,5%-ǵa kóterý múmkindigin qarastyryp otyr.
Qazaqstandyqtar 2024 jyly Shengen vızalarynyń qymbattaýyna tap bolýy múmkin, dep habarlaıdy Almaty-akshamy.kz
Eýrokomıssıanyń saıtynda jarıalanǵan qujatqa sáıkes, Eýropalyq Odaqpen jeńildetilgen vızalyq rejım týraly kelisimge qol qoımaǵan memleketterdiń azamattary úshin Shengen vızalarynyń quny 2024 jyldyń basynda 12,5% ósýi múmkin.
Qazir Shengen vızasynyń quny eresekter úshin 80 eýro, 6-12 jas aralyǵyndaǵy balalar úshin 40 eýro. Bul negizgi somany eresekter úshin 90 eýroǵa jáne balalar úshin 45 eýroǵa deıin arttyrý usynylady.
"Basqa eldermen salystyrǵanda, Shengen aımaǵy úshin 90 eýro kólemindegi vızalyq alym salystyrmaly túrde tómen bolyp qalady", - delingen qujatta.
Talqylaýy 1 naýryzǵa deıin jalǵasatyn joba avtorlary AQSH, Avstralıa, Kanada, Ulybrıtanıa jáne Jańa Zelandıada vıza quny Shengen aımaǵyna qaraǵanda aıtarlyqtaı joǵary ekenin atap ótti.
Sonymen qatar Eýrokomıssıa EO-men jeńildetilgen vızalyq rejımi joq jáne Shengen aımaǵynan deportasıalanǵan óz azamattaryn qaıtarý máselesinde Eýropalyq Odaqpen yntymaqtasýǵa daıyn emes elderdiń kóshi-qon zańnamasyn buzǵany úshin eresek azamattary úshin vıza qunyn kóterýdi usynady. Joba qabyldansa, mundaı azamattarǵa Shengen vızasynyń qunyn 135 nemese 180 eýroǵa deıin kóteretin ereje qoldanylady (qazir sáıkesinshe 120 jáne 160).
Qazaqstannyń Eýroodaqpen ońaılatylǵan vızalyq rejımi joq. 2023 jyly EO men Qazaqstan vızalyq rejımdi jeńildetý boıynsha resmı konsýltasıalardy bastaý týraly kelisimge kelgeni belgili boldy. Soǵan qaramastan, Qazaqstan azamattary Shengenge ótinish bergenge deıin qosymsha keńes alýdy qajet etetin elderdiń tiziminde.