Kelesi jyldyń 5 qańtarynda eski kólikterdi qabyldaý qaıta bastalady
İsten shyqqan kólik quraldaryn joıýǵa qabyldaý 2022 jyldyń 5 qańtarynda qaıta bastalady. QR Indýstrıa jáne ınfraqurylymdyq damý mınıstrligi men QR Ekologıa, geologıa jáne tabıǵı resýrstar mınıstrligi tozyǵy jetken 70 myń eski kólikti (jeńil jáne júk tehnıkasyn) qabyldaýǵa kvota bóldi, dep habarlaıdy Almaty-akshamy.kz QazAqparatqa silteme jasap.
Endi 5 qańtardan bastap kólik qabyldaýdyń elektrondy kezegi ashylyp, óńirlerdegi 18 beket óz jumysyn bastaıdy. 2022 jyly aılyq eseptik kórsetkish mólsheriniń ózgerýine baılanysty, kólik quralynyń sanaty men jıyntyǵyna baılanysty 165 402 teńgeden bastap 606 474 teńgege deıingi aralyqta bolady.
Bıyl qazaqstandyqtar eski kólik tapsyrýdan rekordtyq nátıje kórsetti. 2021 jyly qazaqstandyqtar 50 005 kólikti joıýǵa tapsyrdy. Onyń 37 495 jeńil kólik, 4040 jolaýshy jáne 8 470 júk kóligi. İsten shyqqan mashınasyn joıýǵa tapsyrǵandarǵa 13,833 mlrd teńge qarajat tólendi. Aımaqtar boıynsha kólik tapsyrýdyń aldynda Shymkent qalasy tur. Atalǵan qala turǵyndary 12 068 kólik ótkizgen. Ekinshi orynda 5175 tapsyrǵan Almaty qalasy jáne úshinshi orynda 4788 tehnıka ótkizgen Taraz qalasy tur.
Úzdik tórttikti 3239 birlik mashına tapsyrǵan Qaraǵandy qalasy jaıǵasqan. İsten shyqqan kólik quraldaryn tapsyrýdy yntalandyrý baǵdarlamasy bastalǵannan beri qabyldaý beketteri 214 932 kólik quralyn kádege jaratýǵa qabyldady. Onyń ishinde 194 163 jeńil avtokólik, 14 590 birlik júk tehnıkasy jáne 6 179 birlik aýyr salmaqtyǵy mashına. Qabyldanǵan tehnıkanyń barlyǵy Qaraǵandy zaýytyna kádege jaratýǵa jiberiledi. Qabyldaý beketteriniń mekenjaılary jáne elektrondy kezekke turý recycle.kz saıtynda «Qaldyqtardy basqarý», onyń ishinde «Eski kólikterdi qabyldaý» bóliminde ornalastyrylǵan.