Týberkýlezden bolatyn ólim-jitimniń 17 paıyzǵa tómendegeni baıqalady.
Bıyl ana ólimi 3,5 ese tómendedi. Bul týraly búgin Senattaǵy Úkimet saǵatynda Densaýlyq saqtaý mınıstri Ajar Ǵınıat aıtty, dep habarlaıdy Almaty-akshamy.kz QazAqparatqa silteme jasap.
«Halyqtyń densaýlyǵyn nyǵaıtý - Úkimettiń mańyzdy mindetteriniń biri. Memleket basshysynyń halyqqa medısınalyq kómek kórsetýdiń tıimdiligin arttyrý jónindegi tapsyrmalary aıasynda keshendi jumys júrgizip jatyrmyz. Elimizde bıyl resmı statısıka boıynsha, densaýlyq saqtaýdyń negizgi kórsetkishteriniń oń úrdisi baıqalady. 2020-2021 jyldary pandemıaǵa baılanysty halyqtyń densaýlyǵy kúrt nasharlaǵan bolatyn. Ol tek Qazaqstanda ǵana emes, barlyq dúnıejúzinde baıqalǵan úrdis. Máselen, ótken jyldyń uqsas kezeńimen salystyrǵanda bıyl 9 aıda halyqtyń jalpy ólim-jitim kórsetkishi 28 paıyzǵa tómendep otyr», - dedi mınıstr.
Onyń dereginshe, qan aınalymy júıesi aýrýlarynan bolatyn ólim-jitim kórsetkishiniń shamamen - 32, obyrdan – 9, jaraqattan - 4, tynys alý aǵzalarynyń aýrýlarynan bolatyn ólim-jitim - 33, al týberkýlezden bolatyn ólim-jitimniń 17 paıyzǵa tómendegeni baıqalady.
«Bıyl ana ólim-jitimi 3,5 esege tómendedi. Náreste ólim-jitiminiń absolúttik sany 200-den astam balaǵa tómendep otyr. Al aýrýshańdyq qazirgi aldyn alý zertteýleriniń arqasynda jáne kovıdtiń saldarynan búginde ósip otyr. Halyq densaýlyǵy kórsetkishteriniń jaqsarýy halyqaralyq reıtıńterde de baıqalady. Máselen, 2021 jyldyń qorytyndysy boıynsha Birikken Ulttar Uıymynyń Turaqty damý maqsattary reıtıńinde Qazaqstan Respýblıkasy pozısıasynyń jaqsarǵany baıqalady. 2020 jyly 193 eldiń ishinde Qazaqstan 65-shi oryndy ıelendi. Al 2022 jyldyń basynda Birikken Ulttar Uıymy bizdiń memleketimizdiń reıtıńin 6 pozısıaǵa kóterip, 59-orynǵa deıin jaqsartty», - dedi Ajar Ǵınıat.