Bıyl búdjet tapshylyǵynyń JİÓ-ge qatynasy 2,7% nemese 3,2 trln teńge boldy
QR Premer-Mınıstri Álıhan Smaıylov Qarjy mınıstrliginiń keńeıtilgen alqa májilisinde búdjet tapshylyǵyn joıýǵa alynatyn qaryzdy qandaı kózderden tartý qajettigin aıtty, dep habarlaıdy Almaty-akshamy.kz QazAqparatqa silteme jasap.
«Búdjet tapshylyǵyn jabý men memlekettik qaryzǵa qyzmet kórsetý úshin qarajat tartý da mańyzdy másele. Bıyl búdjet tapshylyǵynyń JİÓ-ge qatynasy 2,7% nemese 3,2 trln teńge boldy.
Buryn tartylǵan qaryzdardy óteý qajettiligin eskersek, qaryz alý qajettiligi 5,7 trln teńgeni quraıdy. Bul - qomaqty soma», - dedi Álıhan Smaıylov.
Úkimet basshysy bul baǵyttaǵy qaryzdyń negizgi bóligi teńgemen jáne ishki naryqtan alynýy kerektigin eskertti.
«Tapshylyqty negizinen ulttyq valútadaǵy İshki qaryz alý arqyly qarjylandyrý qajet. Osylaısha, biz valútalyq táýekelderdi teńestiremiz jáne ishki naryqty damytamyz.
Osyǵan qaramastan, búdjet tapshylyǵyn qarjylandyrý úshin qarajat tartýdyń barlyq áleýetin, onyń ishinde syrtqy naryqtarǵa shyǵýdy paıdalaný qajet.
Osy baǵyttaǵy jumys búdjetti atqarý kezinde kasalyq alshaqtyqtar bolmaıtyndaı, al barlyq boryshtyq ındıkatorlar qaýipsiz deńgeıde bolatyndaı etip qurylýy tıis», - dedi Premer-Mınıstr.