Granttardyń jalpy sany 61 myńǵa deıin jetedi
2021 jyly kadrlardy daıarlaýǵa arnalǵan memlekettik bilim berý tapsyrysy 5 myńǵa, ıaǵnı 51 myńnan 56 myń grantqa deıin kóbeıtilgen. Jańa granttar stýdentter arasynda suranysqa ıe jáne ózekti mamandyqtarǵa bólinetin bolady, dep habarlaıdy Almaty-akshamy.kz
Jalpy, Memleket basshysynyń tapsyrmasy boıynsha joǵary bilimniń qoljetimdiligin arttyrý úshin 2025 jylǵa deıin bilim berý granttarynyń sany kezeń-kezeńimen taǵy da 15 myńǵa artady.
Sondaı-aq bilim berý granttaryn bólý kezinde azamattardyń áleýmettik osal sanattary úshin kvotalar kózdelgen.
«Osylaısha, Prezıdenttiń qoldaýynyń arqasynda búdjet esebinen oqýǵa múmkindik alǵan qazaqstandyq mektep túlekteriniń sany artty. Mysaly, ótken jyly bizge 75 myńnan astam ótinim tústi. Onyń ishinde 56 myńnan astam talapker grant aldy. Bıyl granttar sany 61 myńǵa jetedi. Memleket basshysynyń tapsyrmasy boıynsha halyqtyń áleýmettik osal toptarynan shyqqan balalar úshin kvotalar sanyn ulǵaıttyq. Iaǵnı, kópbalaly nemese tolyq emes otbasylardan shyqqan balalar, sondaı-aq otbasylarynda erekshe qajettilikteri bar balalardy tárbıelep otyrǵan talapkerler grant alý úshin áldeqaıda kóp múmkindikterge ıe bolady», – dep habarlady Bilim jáne ǵylym vıse-mınıstri Qýanysh Erǵalıev.