Medeý aýdanyndaǵy ózekti máselelerdiń biri – Keńsaı, Muztaý jáne Kamenskoe plato shaǵynaýdandarynda ınternet pen uıaly baılanys jelisi turaqty jumys istemeıdi. Buǵan jer bederi sebep bolyp otyr. Bul týraly Almaty qalasy ákimi Erbolat Dosaev turǵyndarmen kezdesý barysynda aıtty, dep habarlaıdy Almaty-akshamy.kz.
2022 jyly sıgnaldyń sapasyn jaqsartý úshin 3 tirekti ornatyp, Keńsaı shaǵynaýdanynda qosymsha mobıldi stansıalardy qosý josparlanǵan.
«2020-2021 jyldary Alataý, Kólsaı, Sulýsaı, Keńsaı shaǵynaýdandarynda baılanys jáne ınternet jelisin ornatý jumystary júrgizildi», – dedi ákim.
Megapolıstiń telekomýnıkasıalyq ınfraqurylymyn damytý úshin 2022 jyly Gornyı Gıgant, Kók-Tóbe 1-2, Kompot, Malaıa Stanısa, Shýaqty shaǵynaýdandaryn joǵary jyldamdyqtaǵy ınternetke qosý jumystary josparlanǵan.
«Joldarǵa jáne adamdar kóp baratyn jerlerge beınebaqylaý obektilerin ornatý jobasynyń aıasynda osy jyldyń sońyna deıin Sergek aparattyq-óndiriktik kesheniniń sany 120-dan 214-ke deıin ulǵaıtylady. Jyldyń sońyna deıin 303 beınebaqylaý kamerasy ornatylady. Aýlalarǵa 185, jol qıylystaryna 80, parkterge 20, bilim berý obektilerine 16, saýda ortalyqtaryna 2 beınekamera ornatylady», – dedi Almaty qalasy ákimi Erbolat Dosaev.
Bul rette Samal shaǵynaýdanyna 103 kamera, Dýman shaǵynaýdanyna 23, Alataý shaǵynaýdanyna 18, Gornyı gıgant shaǵynaýdanyna 3, Asqartaý shaǵynaýdany men Keńsaı saıajaı massıvine 2 kameradan ornatylady. Qalǵan 152 beınekamera kóshelerdiń boıyna qoıylady.
«Keńsaı, Sulýsaı jáne Dýman shaǵynaýdandarynda elektr jelilerin modernızasıalaý boıynsha jobalardy aıaqtaǵanda, beınekameralardyń sanyn kóbeıtetin bolamyz», – dedi qala ákimi.
2020 jyly Medeý aýdany boıynsha «Kar-Tel» JSHS (Beeline) kompanıasy Medeý aýdanynyń Keńsaı, «Mebelshık A/T», Alataý shaǵyn aýdany boıynsha bazalyq stansıalardy iske qosty.
Sondaı-aq, 2020 jyly «Kcell» AQ kompanıasy Medeý aýdanynyń Alataý shaǵyn aýdanynda jańa 2 bazalyq stansıany iske qosty.