Kólik mınıstrligi Air Astana áýekompanıasynyń borttaryn aýystyrýǵa qatysty birqatar tapsyrma berdi. Onyń ishinde ushaqty aýystyrǵan jaǵdaıda jolaýshylarǵa ótemaqy tóleý tártibi ázirlenetin boldy.
«Air Astana» áýekompanıasynyń áýe kemelerin jolaýshylarǵa aldyn ala tıisti habarlamasyz FlyArystan ushaǵyna aýystyrý jaǵdaılarynyń kóbeıýine baılanysty Kólik vıse-mınıstri Talǵat Lastaev «Air Astana» AQ ókilderimen kezdesti.
2023 jyly «Air Astana» áýe kompanıasy 31 588 reısti oryndaǵan, onyń ishinde 226 reıste «Air Astana» áýekompanıasynyń áýe kemeleri «Fly Arystan» áýe kemelerine aýystyrylǵan. Bul oryndalǵan reısterdiń jalpy sanynyń 0,7%-y.
Jıyn nátıjesinde «Air Astana» áýekompanıasyna tapsyrma berildi:
«Air Astana» áýe kemelerin «Fly Arystan» áýe kemelerine aýystyrý praktıkasyn barynsha azaıtý jóninde sharalar qabyldaý;
Ushaqty aýystyrǵan jaǵdaıda jolaýshylardy aldyn ala habardar etý boıynsha jumysty ornatý jáne qamtamasyz etý;
Ushaqty aýystyrǵan jaǵdaıda jolaýshylarǵa ótemaqy tóleý tártibi boıynsha usynystar ázirleý;
«Air Astana» rezervtik áýe kemeleriniń sanyn 1-den 2-ge deıin ulǵaıtý jóninde sharalar qabyldaý.
Kólik mınıstrligi reıske baılanysty ózgerister bolǵan kezde jolaýshylar quqyǵy saqtalýyna monıtorıń júrgizý boıynsha jumysty jalǵastyrady jáne buzýshylyqtar anyqtalǵan jaǵdaıda ákimshilik sharalar qabyldaıdy.