Úkimet pen Ulttyq banktiń birlesken is-sharalary Qazaqstanda ınflásıa qarqynyn baıaýlatýǵa múmkindik berdi. Bul týraly eldiń áleýmettik-ekonomıkalyq máseleleri jónindegi keńeıtilgen keńeste Úkimet basshysy Álıhan Smaıylov aıtty, dep habarlaıdy Almaty-akshamy.kz. QazAqparatqa silteme jasap.
Premer-Mınıstr baǵany turaqtandyrý Úkimettiń jáne jergilikti atqarýshy organdardyń asa mańyzdy mindetteriniń biri ekenin basa aıtty. Osyǵan baılanysty Úkimet pen Ulttyq bank birlesip ınflásıany baqylaý jáne tómendetý boıynsha sharalar keshenin iske asyryp jatyr.
«Nátıjesinde, bıylǵy naýryz aıynda jyldyq ınflásıa 18,1%-ǵa deıin baıaýlady. Keıingi 4 aptada áleýmettik mańyzy bar azyq-túlik taýarlary boıynsha ınflásıa tirkelgen joq. Bizdiń aldymyzda bıyl ınflásıany 2 esege deıin tómendetý mindeti tur», – dedi Álıhan Smaıylov.
Onyń aıtýynsha, respýblıkada Halyqtyń tabysyn arttyrý baǵdarlamasy iske asyrylyp jatyr. Osy is-sharalar aıasynda bıyl 3 mln-nan astam adamnyń jalaqysy ósti.
«Memlekettiń barlyq áleýmettik mindettemeleri ýaqtyly jáne tolyq kólemde oryndalyp keledi. Atap aıtqanda, bıyldan bastap 4,4 mln adamdy joǵarylatylǵan áleýmettik tólemdermen qamtýǵa 4,6 trln teńge bólindi», – dedi Premer-Mınıstr.
Úkimet basshysy ulttyq jobalardy iske asyrý, jańa óndirister ashý, shaǵyn jáne orta bıznesti damytý, jańa jumys oryndaryn qurý esebinen 1 mln-ǵa jýyq adam jumyspen qamtylatynyn aıtty.