Digital Bridge – IT-ındýstrıany damytýdyń sońǵy trendteri men keleshegin talqylaýǵa arnalǵan Ortalyq Azıadaǵy eń úlken alań.
Buǵan sý tasqyny sebep boldy, dep habarlaıdy Almaty-akshamy.kz sıfrlyq damý mınıstrliginiń baspasóz qyzmetine silteme jasap.
Forým qyrkúıek aıynyń basynda Astanada ótýi kerek edi.
"Memleket basshysy Qasym-Jomart Toqaevtyń sý tasqynynan bolǵan eldegi kúrdeli jaǵdaıǵa baılanysty iri is-sharalardan bas tartý týraly tapsyrmasyna sáıkes osy jyldyń 5-7 qyrkúıeginde Astanada josparlanǵan Digital Bridge 2024 halyqaralyq IT forýmyn ótkizýden bas tartý týraly sheshim qabyldandy", - delingen habarlamada.
Bıyl altynshy ret ótýi tıis Digital Bridge 2018 jyly bastalyp, Ortalyq Azıadaǵy IT salasynyń damýyndaǵy sońǵy trendter men keleshegin talqylaıtyn eń úlken alańǵa aınaldy. 2020 jyly da forým álemdi jaılaǵan COVID-19 pandemıasyna baılanysty ótkizilmegen.
Bıyl kóktemgi sý tasqyny Qazaqstanda sońǵy 80 jyldaǵy eń iri tabıǵı apatqa aınaldy.
"Osyǵan baılanysty, aýqymdy zalaldyń saldaryn joıý jáne el azamattaryna kómek kórsetý úshin qarjyny únemdeý maqsatynda memleket basshysy úkimetke josparlanǵan ımıjdik jáne basqa da iri is-sharalardan bas tartýdy tapsyrdy", - delingen vedomstvo habarlamasynda.
Digital Bridge uıymdastyrýshylary – Qazaqstan Respýblıkasynyń sıfrlyq damý, ınovasıalar jáne aeroǵarysh ónerkásibi mınıstrligi jáne Astana Hub halyqaralyq tehnoparki forýmǵa qatysýǵa nıet bildirgenderdiń barlyǵyna alǵysyn bildiredi. Jaǵdaı turaqtanǵan soń, Digital Bridge halyqaralyq IT forýmy 2025 jyly jumysyn jalǵastyrady.