Ákimdik Áýezov aýdanynyń jol ınfraqurylymynyń jaǵdaıyna erekshe kóńil bólip otyr.
Ótken jyly uzyndyǵy 27 km bolatyn 22 kóshege ortasha jóndeý júrgizildi, sondaı-aq jalpy aýdany 25 myń m2 75 kóshe ýchaskesindegi aǵymdaǵy jóndeý jumystary aıaqtaldy, dep habarlaıdy Almaty-akshamy.kz
«Uzyndyǵy 6,8 km bolatyn 33 ýchaskege trotýarlar salyndy. Osy baǵyttaǵy jumystar jalǵasady. 2023 jyly uzyndyǵy 19 km bolatyn 22 kóshege jáne 9 ótpeli jolǵa ortasha jóndeý jumystaryn júrgizýdi josparlap otyrmyz. 2022 jyly sizderdiń suraýlaryńyz boıynsha Saın, Qabdolov jáne Tóle bı kóshelerinde bes jańa aıaldama kesheni ornatyldy», - dedi búgin aýdan halqymen kezdesken megapolıs basshysy.
Oryn alǵan qajettilikke baılanysty, osy jyldyń qazan aıyna deıin Jaıdarman jáne Shaımerdenov kóshelerine qosymsha úsh aıaldama ornatý josparlanýda.
Jol qozǵalysyn retteý jáne jaıaý júrginshilerdiń qaýipsizdigin qamtamasyz etý maqsatynda ótken jyly Jandosov (4), Súleımenov (4), Momyshuly (2), Shalápın (2), Altynsarın (1), Ótegen batyr (1) kóshelerinde 14 jańa baǵdarsham ornatyldy.
Qazirgi ýaqytta Beregovoı kóshesi - Iý. Kım kóshesinde baǵdarsham ornatýǵa jobalaý-smetalyq qujattama ázirleý jáne Tóle bı kóshesi – Fýrkat kóshesi, Tóle bı kóshesi – Saın kóshesiniń shyǵysynda retteletin jaıaý júrginshiler ótkelderin salý jumystary júrip jatyr. Jobalaý-smetalyq qujattama osy jyldyń mamyr aıynyń sońynda aıaqtalady, joba qarasha aıynyń sońyna deıin iske asyrylady.
Únemi sý basatyn jerlerdiń problemasyn sheshý úshin ótken jyly tótenshe jaǵdaı jelisi boıynsha aýdannyń 7 problemalyq ýchaskesinen - Tóle bı kóshesi, Raıymbek dańǵylyndaǵy 5 ýchaske joıyldy. Jubanov kóshesindegi uzyndyǵy 3,5 km kanal tazartylyp, jóndeldi, sondaı-aq Momyshuly kóshesiniń boıynda (Jubanov kóshesinen Tóle bı kóshesine deıin) uzyndyǵy 1,4 km jańa sý burý kanaly salynyp, oǵan aryq jelileri qosyldy, 2,4 km jańa aryq jelisi salyndy.
«Búgingi tańda Abaı dańǵyly men Momyshuly kóshesindegi eki ýchaskede jumystar júrgizilýde. Jumystardy osy jyldyń naýryz aıynyń sońyna deıin aıaqtaımyz», - dedi ákim Erbolat Dosaev.