Premer-Mınıstr Oljas Bektenov óńirlerdegi otandyq agroónerkásip kásiporyndary ókilderimen keńeıtilgen formatta kezdesý ótkizdi, onda aýyl sharýashylyǵy salasyn qoldaý máseleleri jáne astyq jınaý naýqanynyń barysy talqylandy.
Memleket basshysynyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty halyqqa Joldaýynda belgilengen maqsattarǵa qol jetkizý jónindegi sharalar qaraldy, dep habarlaıdy aqshamnews.kz Oqý-aǵartý mınıstrligine silteme jasap.
Kezdesý barysynda AÓK sýbektilerin uzaqmerzimdi memlekettik qoldaý tásilderi qaraldy.
«Memleket basshysy óziniń halyqqa Joldaýynda kásipkerliktiń damýy men ony qoldaý sharalaryna erekshe nazar aýdardy. AÓK-tiń turaqty damýy – bizdiń azyq-túlik qaýipsizdigimizdiń kepili, sondyqtan Úkimet 1 mln-nan astam azamatymyz jumyspen qamtylǵan aýyl sharýashylyǵyn qoldaý sharalaryn jalǵastyra beredi», — dep atap ótti Oljas Bektenov.
Aýyl sharýashylyǵy mınıstri Aıdarbek Saparov jáne Aqmola, Qostanaı, Soltústik Qazaqstan, Jambyl oblystarynyń ákimderi AÓK-ti memlekettik qoldaý sharalaryn iske asyrý týraly baıandady.
Prezıdent tapsyrmasy boıynsha bıyl Úkimet kóktemgi egis jáne astyq jınaý naýqanyn ońtaıly júrgizý úshin qajetti jaǵdaıdyń barlyǵyn jasady. Salany jeńildikpen qarjylandyrý kólemi birinshi ret 3 eseden astam ulǵaıtylyp, rekordtyq kórsetkishke, ıaǵnı, 580 mlrd teńgege jetkizildi. Bul qarajat eginshilerdi tikeleı nesıelendirýge, paıyzdyq mólsherlemeni tómendetýge jáne forvardtyq satyp alýǵa jumsaldy. Syıaqy mólsherlemesin tómendetý Báıterek holdıńi komersıalyq qarajatty tartý satysynda júrgizildi. Kelesi jyly qaıta óńdeý kásiporyndaryn qarjylandyrý kezinde osyndaı tetik iske qosylady. Jalpy, agrobızneske memleket tarapynan tuqym materıaly men tyńaıtqysh satyp alýdan bastap, eksporttyq qoldaýǵa deıingi barlyq kezeńde jan-jaqty kómek kórsetiledi.
Prezıdent tikeleı sýbsıdıalaýdan qoljetimdi nesıe berýge kóshý arqyly AÓK sýbektilerin qarjylandyrý kólemin ulǵaıtý mindetin qoıdy. 2025 jyldan bastap sharýalar qarjy ınstıtýttarynan tikeleı arzandatylǵan nesıe ala alady. Sýbsıdıalaý máseleleri tolyǵymen Aýyl sharýashylyǵy mınıstrligine júkteledi. Osylaısha, sharýa sýbsıdıa resimdeý boıynsha artyq áýre-sarsańnan qutylady.
Bıyl jeńildetilgen nesıeleýdiń rekordtyq kólemine qol jetkizildi. Kelesi jyldan bastap salany qarjylandyrý kólemin arttyryp, 700 mlrd teńgege deıin jetkizý josparlanyp otyr. Premer-Mınıstr Oljas Bektenov bıylǵy jeltoqsan aıynda sharýalarǵa kelesi jyldyń alǵashqy qarjysy túsýi tıis ekenin atap ótti.
Aýyl sharýashylyǵy tehnıkasyn satyp alýdy jeńildikpen qarjylandyrý máselesine erekshe nazar aýdaryldy. Úkimet bıylǵy bólingen qarajat kólemin edáýir ulǵaıtty, bul 2 myńnan astam aýyl sharýashylyǵy taýaryn óndirýshilerge qolda bar parkti jańartýǵa múmkindik berdi. El sharýalary 19,5 myń aýyl sharýashylyǵy tehnıkasyn satyp aldy, jańartý deńgeıi – 5%-dy quraıdy. Bul kórsetkishti jyl sońyna deıin 5,5%-ǵa, kelesi jyly 6,5%-ǵa deıin jetkizý josparlanýda. Sonymen qatar otandyq naryqtyń qajettilikterin eskere otyryp, aýyl sharýashylyǵy tehnıkasyn shyǵaratyn qazaqstandyq kásiporyndardyń qýatyn arttyrý tapsyryldy.
Bıylǵy naýryz aıynda elimizde otandyq tyńaıtqyshtardy satyp alý úshin avanstyq sýbsıdıalaý tetigi engizildi. Kóktemgi egis jáne egin jınaý jumystaryn memlekettik qoldaýdyń arqasynda bıyl topyraqqa 1,2 mln tonna tyńaıtqysh engizildi, bul ótken jylǵy deńgeıden 2 esege artyq. Memleket basshysynyń aýyl sharýashylyǵy jerleriniń tozýyn azaıtý jónindegi tapsyrmasyn eskere otyryp, ákimdikter 2025 jyly tyńaıtqysh engizý kólemin 1,9 mln tonnaǵa deıin arttyrýy qajet.
Otandyq tuqym sharýashylyǵyn damytý máselesin qarastyrý kezinde ósimdik sharýashylyǵynda, ásirese kókónis, jemis jáne baqsha daqyldaryna qatysty ımporttyq tuqym materıaldaryn paıdalanýdy qysqartýdyń mańyzdylyǵy atap ótildi. Aýyl sharýashylyǵy mınıstrligine seleksıa jáne tuqym sharýashylyǵy júıesin sapaly damyta otyryp, osy máselemen aınalysý tapsyryldy. Sondaı-aq otandyq tuqym óndirýshilerdiń paıdasyna sýbsıdıalaý tetigin qaıta qaraý qajettigi kórsetilgen.
Jıynǵa qatysýshylardyń nazary ónimdi qaıta óńdeý jáne eksporttaý arqyly ótkizýge aýdaryldy. ASHM derekteri boıynsha bıylǵy astyq ónimi kem degende 20 mln tonnaǵa jetedi dep kútilýde. «Atameken» palatasymen Saýda jáne ıntegrasıa mınıstrligine dástúrli ónimdermen shektelmeı, Ortalyq Azıa, Qytaı, Aýǵanstan jáne Iran sıaqty aýyl sharýashylyǵy ónimderiniń basym eksporttyq naryǵyn keńeıtý, sonymen qatar EO elderi, Soltústik Afrıka, Ońtústik-SHyǵys Azıa jáne t. b. jańa baǵyttardy pysyqtaý tapsyryldy.
Premer-Mınıstr elimizdiń azyq-túlik ónimderimen ózin-ózi qamtamasyz etýiniń mańyzdylyǵyn atap ótti. Aýyl sharýashylyǵy salasyn jan-jaqty qoldaý jáne oǵan qolaıly jaǵdaı jasaý baǵytynda qajetti sharalardyń barlyǵyn qabyldap jatqanyn atap ótti. Sonymen qatar bıznes te ashyq ári adal jumys isteýi tıis. Memleketten bólingen qarajattyń tıimsiz jumsalýyna jol bermeý úshin 2025 jyly elimizde aýqymdy aýyl sharýashylyǵy sanaǵy júrgiziledi. Ol jer jáne egis alqaby, mal basy, aýyl sharýashylyǵy tehnıkasy men ınfraqurylym boıynsha derekterdi ózektendirýge múmkindik beredi.
«Prezıdent Joldaýynda aýyl sharýashylyǵyn damytý, ónimdilikti arttyrý jáne aýyl turǵyndaryn jyl boıy jumyspen qamtý, salany tıimdi ári ashyq qarjylandyrý boıynsha naqty mindetter qoıyldy. Atalǵan jumys memleket pen bıznestiń birlesken tyǵyz qarym-qatynasy sheńberinde iske asyrylýy tıis. Tek sonda ǵana biz joǵary nátıjege qol jetkizemiz», — dep atap ótti Oljas Bektenov.