Elge oralǵandardyń jartysynan kóbi Ózbekstannan kelgen.
Ústimizdegi jyldyń basynan beri Qazaqstanǵa oralǵan qandastardyń sany artyp, alty myńǵa jýyq adam qandas mártebesin aldy, dep habarlaıdy Almaty-akshamy.kz.
«2022 jylǵy 1 maýsymdaǵy jaǵdaı boıynsha, 5 679 etnıkalyq qazaq tarıhı otanymen tabysyp, qandas mártebesin aldy. Jalpy, 1991 jyldan beri respýblıkaǵa 1 mıllıon 93,5 myń etnıkalyq qazaq oraldy», - delingen Eńbekmıni baspasóz qyzmetiniń habarlamasynda.
Jyl basynan beri Qazaqstanǵa kelgen qandastardyń jartysynan kóbi (68,7%) Ózbekstannan, 10,4% – Qytaıdan, 8,8% – Túrikmenstannan, 2,6% – Mońǵolıadan jáne 9,5% basqa elderden qonys aýdarǵan.
Kelgen etnıkalyq qazaqtar negizinen Almaty (31,1%), Mańǵystaý (18,8%), Túrkistan (10,3%) jáne Jambyl (6,2%) oblystaryna, sondaı-aq Almaty (6%), Nur-Sultan (6,9%) jáne Shymkent (7,9%) qalalaryna qonystandy.
Osy jylǵy 1 maýsymdaǵy jaǵdaı boıynsha, eńbekke qabiletti jastaǵy etnıkalyq qonys aýdarýshylar sany 63,2%, eńbekke qabiletti jastan kishi qonys aýdarýshylar sany 22,8% jáne zeınetkerler sany 14%.
Eńbekke qabiletti jastaǵy qandastardyń ishinen bilim deńgeıi boıynsha 11,4%-y joǵary bilimdi, 40,3%-y orta kásibı bilimdi, 46,6%-y jalpy orta bilimdi jáne 1,7%-nyń bilimi joq.