Bul týraly Almaty qalasy ákimi apparatynyń basshysy Beıbit Shahanov jumys sapary barysynda málimdedi, dep habarlaıdy almaty-akshamy.kz.
Alǵashqy nysan Naýryzbaı aýdany №7 qalalyq aýrýhananyń aldyndaǵy jer asty ótkeli edi. Munda jóndeý jumystary osy jyldyń qyrkúıek aıynda bastalyp, qazan aıynyń sońyna deıin aıaqtalady. Sándik plıtkalar (keramogranıt) qalpyna keltirilip, energıany únemdeıtin shamdar qoıylady, beınebaqylaý kameralary ornatylyp, shatyr men taktıldi plıtalardy aýystyrý kózdelgen. Aýdan ákimine sapasyz materıaldardy paıdalanbaýǵa jol bermeý tapsyryldy.
«Almaty qalasy boıynsha barlyǵy 74 jer ústi jáne 56 jer asty jaıaý júrginshiler ótkeli bar. Bıyl jańǵyrtylyp jatyr. Kelesi jyly 5 jer ústi ótkelinde qurylys-montaj jumysy josparlanǵan. Ótkelder antıvandaldy shamdarmen, taktıldi plıtalarmen jáne beınekameralarmen jabdyqtalady», - dedi apparat basshysy Beıbit Shahanov.
Múmkindigi shekteýli jandardyń yńǵaıly bolýy úshin Rysqulov dańǵyly-Dospanov kósheleriniń qıylysyndaǵy jer ústi ótkeline jedel saty ornatylady. Bul ekinshi nysan edi. Kúrdeli jóndeý aıasynda qoldanystaǵy asfáltbeton jabyndaryn bólshekteý, sándik plıtkalar men sý burý qurylǵylaryn qalpyna keltirý, aralyq qurylystardyń metal konstrýksıalaryn, tirekterdi, baspaldaq jıekterin syrlaý, lıftiler men kótergishterdi kúrdeli jóndeý, shatyrdy aýystyrý, irgeles aýmaqty abattandyrý júrgizildi. Búginde jóndeý jumystary aıaqtaldy.
Sonymen qatar, Raıymbek dańǵylynyń qıylysyndaǵy Saıyn kóshesi boıyndaǵy jer ústi ótkelinde kúrdeli jóndeý júrgizýge JSQ ázirlenip jatyr. JSQ-da asfáltty avtomatty jylytý júıesi bar plıtalarǵa aýystyrý, shatyr men lıft jabdyǵy elementterin aýystyrý, jaryqtandyrýdy jańartý jáne beınebaqylaý kameralaryn ornatý kózdeledi.
Buǵan qosa, erekshe qajettiligi bar adamdardyń jaıly júrip-turýy úshin jaıaý júrginshiler ótkelderinde ınklúzıvti orta qurý boıynsha jumys jalǵasyp otyr. 74 jer ústi jáne 56 jer asty jaıaý júrginshiler ótkelinde 87 birlik lıft qurylystary jáne 93 birlik kótergish platformalar bar, onyń ishinde:
- 51 birlik lıft qurylysy men 33 birlik kótergish platforma jaramdy, shtattyq rejımde jumys isteıdi;
- 34 birlik lıft qurylysy men 38 birlik kóterý platformasy boıynsha jumys bıyl jyl sońyna deıin aıaqtalady;
- qalǵan 2 birlik lıft qurylysy jumys istemeıdi, Jetisý aýdanynyń ákimdigi ony 2024 jylǵa josparlaǵan.
