Jalpyǵa birdeı deklarasıalaý 4 kezeńnen turady
Elimizde jalpyǵa birdeı deklarasıany tapsyrý merzimi qaǵaz júzinde 15 shildede aıaqtalady. Al elektrondy nusqasy 15 qyrkúıekke deıin qabyldanady. Bıyl Almaty qalasy boıynsha 37 myńnan asa deklarasıa qabyldandy, dep habarlaıdy Almaty-akshamy.kz Almaty.tv-ge silteme jasap.
Jalpyǵa birdeı deklarasıalaý 4 kezeńnen turady:
1. Memlekettik qyzmetkerler, laýazymdy tulǵalar jáne olardyń jubaılary;
2. Kvazımemlekettik sektor qyzmetkerleri jáne memlekettik mekemelerdiń qyzmetkerleri;
3. Zańdy tulǵalardyń quryltaıshylary, basshylary jáne jeke kásipkerler;
4. Deklarasıa halyqtyń qalǵan sanattarymen usynylady.
«Azamattarǵa deklarasıalardy tapsyrýdy yńǵaıly etý maqsatynda memlekettik kirister komıteti e-salyq azamat qosymshasyn jasap shyǵardy.Osy e-salyq qosymshasy arqyly uıaly telefonmen deklarasıany tapsyrýǵa bolady. Byltyr memlekettik qyzmetkerler 250 nysandy tapsyrsa, bıyldan bastap 270 nysan deklarasıa tapsyrady», – dedi Memlekettik kirister departamenti óndiristik emes tólemder basqarmasynyń basshysy Qýanysh Túmenbaev.
Sondaı-aq sarapshy Maqsat Halyqtyń aıtýynsha, jalpyǵa birdeı deklarasıa salyqtan jaltaryp hám tabysyn jasyryp júrgenderdi anyqtaýǵa múmkindik beredi.
«Negizi halyq árbir taýyp jatqan tabysy jóninen esep berý qajet degen. Bul ne úshin qajet? Halyqtyń tabysyn qandaı dárejede ekenin anyqtaý úshin kerek. Sondyqtan da men oılaımyn halyqtyń basym kópshiligine onyń keri áseri bolmaıdy. Bul jerde tabysyn jasyryp júrgen 10 paıyz deńgeıindegi adamdar bar», – dedi ekonomıs Maqsat Halyq.
Qandaı jolmen tabys tapsańyz da, bárin deklarasıada jazýǵa mindettisiz. Al keıbirin jasyryp qalǵan bolsańyz, basyńyz daýǵa qalady. Deklarasıada kórsetilgennen artyq tabysyńyz bolǵany anyqtalsa, onyń 10 paıyzynan salyq tóleısiz. Ony tapsyrý merzimin buzsańyz 45 myń teńge aıyppul arqalaısyz.