Almatyda halyqaralyq forýmda agrarlyq saladaǵy ózekti máseleler talqylandy
Bıyl agroónerkásip keshenin damytýdyń ulttyq jobasyn júzege asyrý bastaldy dep habarlaıdy Almaty-akshamy.kz Almaty.tv-ge silteme jasap.
Jobanyń 10 jylǵa naqty tujyrymdamasy bekitilgen. Bul elimizde áleýmettik mańyzy bar taǵam túrlerin sapaly óndirý men osy salada jumys oryndarynyń kóbeıýine múmkindik týǵyzady. Al agrarlyq saladaǵy ózge de ózekti máseleler búgin Almatyda ótken halyqaralyq forýmda talqylandy. Jıynǵa shet eldiń joǵary oqý oryndarynyń rektorlary da qatysty.
«Búgin pandemıadan keıin alǵashqy ret offlaın rejıminde TMD jetekshi agrarlyq ýnıversıtetiniń rektorlary jınalyp otyr. Maqsaty – búgingi ǵylymı konferensıada tájirıbe almasý. Ǵylymı tájirıbelerdi alyp, biz ózimizdiń Qazaqstandyq agrarlyq ýnıversıtetterdiń jumysynda paıdalanatyn bolamyz», – dedi QR Aýyl sharýashylyǵy mınıstri Erbol Qarashókeev.
Sondaı-aq halyqaralyq forým kezinde «Sapaly tamaqtaný» men «Ónegeli ómir» kitaptary kópshilikke tanystyryldy. Kitapta agroónerkásip salasyn damytýdyń túrli baǵyttary kórsetilgen. Ádistemelik oqýlyq Londanda úsh tilde basylyp shyǵypty.
«Qazaqstandy agrarly salada damytý kerek. Dúnıejúzinde 10 jyldyń ishinde azyq-túlik máselesi týyndap tur. Sondyqtan da bizdiń eldi damytý, eksport máselesin sheshý, ártúrli salalardy kóterý máselesin talqylaýǵa búgin rektorlar jınalyp otyr», – dedi Ulttyq ǵylymı bilim ortalyǵynyń tóraǵasy Darhan Balpanov.