Qazaq pen qyrǵyz – ejelden irgesi bólinbegen, tarıhy men taǵdyry egiz halyq. Qazirgi tańda osy yntymaqtastyqtyń sabaqtastyǵyn saqtap, odan ári damytý asa mańyzdy. Osyndaı maqsatpen Bishkekte qazaq-qyrǵyz jastarynyń alǵashqy forýmy ótti. Birtýǵan elderdiń birligin bekemdeýdi kózdegen is-sharaǵa bir top áriptesimmen birge biz de arnaıy qatystyq.
Prezıdentimiz Qasym-Jomart Kemeluly Toqaev Qyrǵyzstan – elimiz úshin tek odaqtas qana emes, baýyrlas memleket ekenin únemi aıtyp keledi. Joǵary deńgeıdegi ekijaqty baılanys qazaq-qyrǵyz qarym-qatynasynyń barlyq baǵytta qarqyndy damýyna negiz bolyp otyr.
Osy oraıda jastarymyzdyń da bas qosyp, ortaq máselelerdi talqylap, oı-ıdeıalarymen bólisýine jaǵdaı jasaý, olardyń dostyqtaryn nyǵaıtý memleketter úshin aıryqsha mánge ıe ekenin atap ótken jón.
Jalpy, bizdiń ortaq tarıhymyzda ónege retinde kórsetýge turatyn qarym-qatynastar az emes. Bul rette rýhanıat pen mádenıettiń alar orny erekshe. Onyń ishinde áıgili «Manas» jyryn alǵash ret Shoqan Ýálıhanovtyń qaǵazǵa túsirgeni, Súıinbaı men Arystanbek, Jambyl men Toqtaǵul, Kenen men Osmanquldardyń baılanysy kópke málim.
Muhtar Áýezov pen Shyńǵys Aıtmatovtyń jáne basqa da zıaly qaýym ókilderiniń dostyq pen týysqandyqqa taban tiregen baılanystary bárimizge úlgi. Osyndaı jaqyndyq óskeleń urpaq úshin ónege bolýǵa tıis.
Sondyqtan jastarymyz babalardan amanat bolǵan izgi dástúrdi laıyqty jalǵap, mádenıetpen birge ǵylym-bilim, ınovasıa, bıznes jáne taǵy basqa salalarda birlesip áreket etedi dep senemiz. Forýmnyń basty maqsaty da osy.
Qyrǵyz eline sapar barysynda áıgili jazýshy Shyńǵys Aıtmatovtyń 95 jyldyǵyna arnalǵan halyqaralyq konferensıaǵa da qatystyq. Adamzattyń Aıtmatovy atanǵan tulǵanyń ónegeli ómiri men shyǵarmalary eki halyqtyń arasyndaǵy «altyn kópiri» ekeni daýsyz.
Álemdik ádebıettiń fenomenine aınalǵan qalamgerdiń týyndylary negizinen gýmanızm men adamgershilikti dáripteıdi. Sondyqtan ol shyǵarmalar eshqashan óziniń ózektiligin joǵaltpaıdy. Qaıta, búgingideı qundylyqtar qunsyzdanǵan, popýlızm men jalǵan urandar beleń alǵan kezeńde olardyń mańyzy arta túsetini anyq. Sondyqtan Aıtmatovtyń murasyn dáripteý qazaq úshin de erekshe mánge ıe.
Sonymen qatar sapar kezinde Qyrǵyzstan Jogorký Keneshiniń qurylǵanyna 85 jyl tolýyna oraı uıymdastyrylǵan halyqaralyq konferensıaǵa jáne TMD Parlamentaralyq Assambleıasynyń 56-shy plenarlyq otyrysyna qatystyq. Sondaı-aq TMD elderinen kelgen birqatar áriptesimmen ekijaqty kezdesýler ótkizip, parlamentaralyq yntymaqtastyqty nyǵaıtýdy jáne ózge de mańyzdy máselelerdi talqyladyq.
Aldaǵy ýaqytta bul sapar tamyry bir baýyrlas elderdiń bereke-birligin arttyrýǵa óz septigin tıgizedi dep senemiz.