Qyrǵyzstanda dostyq aleıasy paıda boldy
Qos eldiń táýelsizdik alǵanyna 30 jyl tolýyna oraılastyrylǵan «Kelisim» aleıasynyń ashylý saltanatyna Qazaqstan elshisi Rapıl Joshybaev, Qyrǵyzstan Joǵary Keńesiniń spıkeri Talant Mamytov, Bishkek qalasynyń meri Aıbek Djýnýshalıev jáne Parlament depýtattary qatysty, dep habarlaıdy Almaty-akshamy.kz. Munda eki eldiń dostyq qarym-qatynasynyń belgisi retinde Tán-SHan shyrshasynyń 40 kósheti egildi. Bul aǵash 300 jylǵa deıin ómir súredi.
«Elimiz bıyl Táýelsizdiginiń 30 jyldyǵyn atap ótip jatyr. Sondyqtan dostyq aleıasyn dál osy kezde ashyp jatqanymyzdyń ózindik bir máni bar. Bizdiń halqymyz rýhy men mádenıeti jaǵynan uqsas. Qundylyqtarymyz da ortaq. Sondyqtan bir-birimizdi jaqsy túsinemiz. Jańa saıabaqta ánderimiz shyrqalyp, merekelik kúnderdi sol jerde atap ótsek, tamasha bolar edi», - dedi Qyrǵyzstan Parlamentiniń spıkeri Talant Mamyrov.
«Bul aleıanyń ashylýy baýyrlas eki halyqtyń myzǵymas dostyǵyn aıshyqtaıdy. Qazaq-qyrǵyzdyń rýhy bir. Bizdiń halqymyzdy tereńnen tamyr tartqan baýyrlastyq, dostyq, mádenı-ekonomıkalyq qatynastar baılanystyrady. Sondyqtan aleıanyń ashylýynyń sımvoldyq máni zor. Bul - bizdiń dostyǵymyzdyń belgisi», - dedi Qyrǵyzstandaǵy qazaq dıasporasynyń basshysy Gúlshat Asylbaeva.