Qaraǵandylyq ájeler Qyrǵyz elinde ótken Ortalyq Azıanyń VIII Halyqaralyq bı olımpıadasynda top jaryp, bas júldeni ıemdengen, dep habarlaıdy Almaty-akshamy.kz «Habar 24»-ke silteme jasap.
Aıta ketken jón, bul aıyr qalpaqty aǵaıyndardyń elinde 8 jyl boıy dástúrli túrde ótip kele jatqan eń iri bı jarysy bolyp esepteledi. «Nurbı» úlgili bı ansambli músheleriniń eń jasy 65-te bolsa, egde tartqany 85-ke kelipti. Tarıhy tereń Bishkektiń tórinde bizdiń ájeler erkin oıqastaıdy. Ortalyq Azıadaǵy olımpıadanyń ortasynda myń buralǵan olar qarsylastarǵa esh múmkindik bermegen. Nátıje mynaý: 2 kýbok jáne dıplom.
Toptyń quramynda 25 bıshi bar. Arasynda elevator tehnology, dáriger, tárbıeshi, muǵalim, memlekettik qyzmetker men saýynshy da kezdesedi.
Ájelerdiń repertýarynda 15-ke jýyq bı bar. Kóbi – ulttyq bıler. Shyǵarmashylyq top aldaǵy ýaqytta óz ónerimen oblystyń birqatar óńirin aralap, konsert berýdi josparlap otyr.