Búgin birqatar májilis depýtaty Qazaqstanda biryńǵaı ýaqyt beldeýine qatysty málimdeme jasap, aldaǵy ýaqytta Májilis qabyrǵasynda tyńdaý ótkizetinderin habarlady.
Májilis depýtaty Luqbek Tumashınov Saýda jáne ıntegrasıa mınıstri Arman Shaqqalıevke ýaqytty ózgertý máselesinde qazaqstandyqtardyń pikiri nege eskerilmedi degen saýalmen júgindi, dep habarlaıdy aqshamnews.kz.
Saýda mınıstri saǵat beldeýin qaıtarý máselesi 2-3 jyldan keıin talqylanady dep jaýap berdi. Biraq «Amanat» partıasynyń depýtattary kútýge daıyn emes. Olar aldaǵy ýaqytta bul másele boıynsha Májiliste arnaıy tyńdaý ótkizýdi josparlap otyr.
Depýtattardyń aıtýynsha, jazda óńirlerdi aralaý kezinde Shyǵys Qazaqstan, Abaı, Soltústik Qazaqstan, Pavlodar, Jetisý oblystarynda turǵyndardan eń kóp qoıylǵan suraq osy ýaqyt beldeýine qatysty bolǵan.
"Myńdaǵan halyqtyń aryz-shaǵymyna qaraı málimdeme jasap otyrmyz. Búgin osy másele boıynsha Amanat fraksıasynyń májilisin ótkizdik. Turǵyndar burynǵy ýaqyt beldeýin qaıtaryp berýdi talap etip otyr. Bul beldeý batys óńirler, Qostanaı, Qyzylorda oblystary úshin qolaıly shyǵar, degenmen shyǵys úshin tıimsiz", – dedi májilis depýtaty Maqsat Tolyqbaı.
Áriptesiniń sózin Májilis depýtaty Dáýlet Muqaev ta qoldady.
"Shyǵys Qazaqstanda 2.30-da tań atady. Adamdar sıyrdyń móńiregen daýysynan oıanady. Al keshki 5-6-larda dalada tas qarańǵy. Ekinshi, úshinshi aýysymda oqıtyn oqýshylar qalaı úıine qaıtady? Kóshelerde jaryq ta joq. Jer úlken bolǵandyqtan, bir ýaqyt beldeýi aldyn ala zerttelýi kerek edi", – degen májilis depýtaty alda josparlanyp otyrǵan tyńdaýǵa úkimet músheleri, ǵalymdar, sala mamandary shaqyrylatynyn aıtyp, qazaqstandyqtardy da óz usynysyn berýge shaqyrdy.
Ýaqyt - úkimettiń de, memlekettiń de menshigi emes! Úkimettiń bul másele boıynsha naqty sheshim qabyldaýyna yqpal etemiz", – dep túıindedi Maqsat Tolyqbaı.