Banknottyń 25 qorǵanysh elementi bar.
2022 jylǵy 1 qazanda Qazaqstan Ulttyq Banki nomınaldyq quny 20 000 teńgelik banknotty aınalymǵa shyǵarady, dep habarlaıdy Almaty-akshamy.kz.
«Banknot aınalymdaǵy aqsha belgilerimen biryńǵaı stılde jasalǵan. Mysaly, bet jaǵynda kóbine tiginen oryndalǵan beıneler, syrt jaǵynda kóldeneń oryndalǵan beıneler ornalasqan. Dızaıny nomınaldyń golografıalyq beınesi tiginen ornalasqan metalsyzdandyrylǵan jolaqty qoldana otyryp jasalǵan»,- delingen Ulttyq banktiń baspasóz qyzmetiniń habarlamasynda.
Banknottyń 25 qorǵanysh elementi bar, mólsheri 155h79 mm jáne sur túske basymdyq berilgen.
Bet jaǵynda Qazaqstan Respýblıkasynyń Memlekettik rámizderi, «Qazaq Eli» monýmenti, «Máńgilik El» saltanat qaqpasy, «Basqur» qazaq ulttyq oıý-órneginiń fragmenti jáne Táýelsizdik jyldaryn bildiretin «30» sany beınelengen.
Banknottyń ekinshi betinde Astananyń jáne Aqorda rezıdensıasynyń panoramalyq kórinisin kórýge bolady.
Nomınaly 20 000 teńgelik jańa dızaındaǵy banknot óz qunyna saı Qazaqstan Respýblıkasynyń búkil aýmaǵynda tólemderdiń barlyq túri boıynsha qabyldaýǵa, sondaı-aq eldegi bankterde banktik shottarǵa esepke alýǵa jáne aýdarýǵa, usaqtaýǵa, aıyrbastaýǵa jatady.
Jańa kýpúra «Qazaq Eli» serıasymen usynylǵan qazirgi tańda aınalymda bar 500, 1 000, 2 000, 5 000 jáne 10 000 teńgelik nomınaldaǵy banknottardyń qataryn tolyqtyrady.