Nurtileý Imanǵalıulynyń týǵanyna - 70 jyl
Alashtyń birtýar azamaty, jampoz jýrnalıs Nurtileý Imanǵalıulyn bilmeıtin jan kemde-kem. Aqparat salasynyń qara naryna aınalǵan biregeı tulǵa kózi tirisinde el rýhanıatyna súbeli úles qosyp, qazaq telejýrnalıstıkasynyń qalyptasýyna bar qajyr-qaıratyn jumsady. Tersińdi eńbek, telegeı ter shúmektetip eńbek etken ol muhıt baýyrynan marjan súzgendeı myńjyldyqtardan bergi qundylyqtardy jýrnalısik qarymy men darynyna ushtastyryp, ult perzentine aınaldy.
Ǵasyr qalyptastyrǵan, jyldar somdaǵan tuǵyrly tulǵalar sapynan osylaısha oıyp oryn, teýip tuǵyr saılaǵan Nurtileý Imanǵalıulynyń týǵanyna 70 jyl tolýyna oraı «Baı-qýatty bolaıyq!» kórmesi uıymdastyryldy.
Arqa tósindegi ajarly Astanamyzdan bastaý alǵan ıgilikti sharanyń jalǵasy Semeı, Shymkent, Atyraý, Aqtaýda ótken bolatyn. Taldyqorǵan qalasyndaǵy M.Tynyshpaev atyndaǵy tarıhı-ólketaný mýzeıinde jyl boıy ótken kórmeniń qorytyndysy retinde uıymdastyrylǵan shara shymyldyǵyn Jetisý oblysynyń ákimi Beıbit Isabaev quttyqtaý sózben ashty.
– Nurtileý aǵamyz jýrnalısıka salasynda laıyqty orny bar, ózindik súrleý-soqpaǵyn qalyptastyrǵan kánigi maman bolatyn. Onyń esimi el arasynda aıtylsa boldy, qalyń jurtshylyq Nurtileý Imanǵalıulynyń ózi júrgizgen televızıalyq týyndylaryn «Baı-qýatty bolaıyq!» dep aıaqtaıtynyn birden eske alyp jatady. Oǵan da negiz bar. Sebebi, bolmys-bitimi osy uǵymmen ábden astasyp turatyndaı edi. «Betpe-bet», «Qoltańba», «Dińgek», «Kórshiler», «Zań sóılesin», «Nur-Tiley» sekildi avtorlyq habarlary kórermenniń úzbeı kóretin baǵdarlamalaryna aınaldy. Sol arqyly halyqtyń súıispenshiligine bólenip, alǵysyn arqalady. Ómiriniń sońyna deıin qazaq televızıasynyń tutas bir býynyn tárbıelep, jýrnalısıkanyń damýyna ólsheýsiz úles qosty desem, artyq aıtqandyq emes, – degen aımaq basshysy óz kezeginde áriptes bolyp qyzmet etken jyldardaǵy estelikterimen bólisti.
Jampoz jýrnalısiń adamgershilik qasıetin, parasaty men bıik ustanymyn áńgimege arqaý etti. Sonymen qatar, Nurtileý Imanǵalıulynyń zaıyby Qarlyǵash Sovetbekqyzy men kórmeni uıymdastyrýǵa atsalysqan QR Eńbek sińirgen qaıratkeri Amantaı Berǵalıevke alǵys hat tabys etip, ıyǵyna zerli shapan japty.
Óz kezeginde sóz alǵan Atyraý oblysynyń Qurmetti azamaty Amantaı Berǵalıev, tulǵanyń zaıyby Qarlyǵash Sovetbekqyzy, «Jetisý» telearnasynyń dırektory Serik Sarybaev, memleket jáne qoǵam qaıratkeri, «Qabanbaı batyr» qorynyń tóraǵasy Kamal Abdrahmanovtar sóz sóılep, biregeı tulǵanyń ǵıbratty ǵumyrynan syr shertti. Al jetisýlyq aqyn Zıragúl Nurdanbekqyzy kemel oıly jýrnalıske arnaǵan óleńin oqydy.
Jetisý oblysynyń mádenıet, muraǵattar jáne qujattama basqarmasynyń qoldaýymen jáne M. Tynyshpaev atyndaǵy tarıhı-ólketaný murajaıynyń bastamasymen ótken bul kóshpeli kórmege barlyǵy 200 eksponat qoıylǵan. Nurtileý Imanǵalıulynyń kózi tirisinde paıdalanǵan jeke zattary, jumys quraldary, sportta jetken jetistikteri, qyzmettik kýálikteri, kitap, saǵattary syndy jeke zattary kórermen nazaryna usynyldy.
Aıta ketsek, atalmysh kórmeni qala turǵyndary men qonaqtary 7–30 jeltoqsan aralyǵynda tamashalaı alady. Sonymen qatar, tulǵanyń esimin týǵan jerinde máńgilik qaldyrý maqsatynda kelesi jyldan bastap ıgilikti ister qolǵa alynbaq. Aldymen maıtalman jýrnalısiń ómiri men shyǵarmashylyǵy týraly tolymdy kitap josparda tur.