Zeınetaqy jınaǵyn alǵandardyń arasynda almatylyqtar kóp.
2021 jyldyń qańtarynan osy ýaqytqa deıin 1 mıllıonnan astam qazaqstandyq zeınetaqy jınaqtaryna baspana aldy, emdelýge jumsap, ózge qarjy ınstıtýttaryna senimgerlik basqarýǵa berdi, dep habarlaıdy Almaty-akshamy.kz QazAqparatqa silteme jasap.
Biryńǵaı jınaqtaýshy zeınetaqy qorynyń málimetinshe, 2021 jyldyń qańtary men osy jyldyń 1 naýryzy aralyǵynda 967 853 qazaqstandyq zeınetaqy jınaǵynyń shekti mólsherden asatyn somasyn úı jaǵdaıyn jaqsartýǵa alý úshin ótinim berdi. Olarǵa qordan 2,7 trln teńge qarjy aýdaryldy. Bul rette birjolǵy zeınetaqy tólemderiniń ortasha somasy 3,1 mln teńge boldy. Zeınetaqy jınaǵyn alǵandardyń basym kópshiligi Almaty, Nur-Sultan qalalarynyń jáne Mańǵystaý oblysynyń turǵyndary.
Aıta keterligi, ýákiletti operatorlardan salymshylardyń (alýshylardyń) jeke zeınetaqy shottaryna ótinish berýshiniń ótinishi jáne ózge de sebeptermen 379,9 mlrd teńgeden asa qarajat qaıtaryldy. Sebebi, qazaqstandyqtar birjolǵy zeınetaqy tólemderin belgilengen merzimde paıdalanbaǵan.
Sonymen qatar 198 657 azamat zeınetaqy jınaqtaryn emdelýge paıdalaný úshin ótinim berdi. Jalpy soma 176,4 mlrd teńgeni quraıdy. Bul rette alýǵa bolatyn ortasha soma – shamamen 0,9 mln teńge. Biraq, ótinish berýshiniń ótinishi nemese ózge de sebeptermen belgilengen merzimde paıdalanylmaǵan 19,9 mlrd teńge salymshylardyń shottaryna qaıtaryldy.
BJZQ zeınetaqy aktıvterin senimgerlikpen basqarýǵa qatysty tórt ınvestısıalyq portfeldi basqarýshymen shart jasasqan. Osylaısha salymshylardyń 7,6 mlrd teńgesiniń 45,86% nemese 3,46 mlrd teńgesi «Jusan Invest» AQ-qa, 27,65% nemese 2,09 mlrd teńgesi «Halyk Global Markets» AQ-qa, 15,97% nemese 1,21 mlrd teńgesi «BCC Invest» AQ-qa, 10,53% nemese 0,80 mlrd teńgesi «Sentras Sekúrıtız» AQ-qa aýdaryldy.