"Daýylpaz" dáriger - balalar ómiriniń arashashysy.
Bir jylda 3 jasqa deıingi búldirshinderdiń aǵzasynan 80-nen astam ıne, oıynshyq, tıyn sekildi bógde zattar shyqqan.
Bul týraly «Balalarǵa jedel medısınalyq kómek kórsetý ortalyǵynyń» dárigerleri málim etti, dep habarlaıdy Almaty-akshamy.kz Almaty.tv-ǵa silteme jasap.
Olardyń aıtýynsha, ómirine qaýip tóngen balalardy kóbine Murat esimdi hırýrg emdeıdi. Sebebi onyń biliktiligine, áriptesteriniń aıtýynsha, teń keler maman joq. Eki jastaǵy búldirshinniń anasy Álıman sol kúndi qorqynyshpen eske alady. Búldirshin oınap otyryp, tıyn jutyp qoıǵan. Sodan temir zat tynys alý múshesine turyp qalyp, bala tunshyǵa bastaǵan.
«Qorqyp, "jedel járdem" shaqyrdyq. Sodan osy qalalyq jedel járdem aýrýhanasyna alyp keldi», – dedi qala turǵyny Álıman Ámirova.
Sol sátte aýrýhanaǵa hırýrg Murat Dúısebaev ta shuǵyl jetedi. Sodan bul balany ózi qabyldap, aman alyp qalady. "Daýylpaz" dáriger 5 jyl ishinde júzdegen ota jasap, qolynda adam ólmegen. Onyń biliktiligine áriptesteri de tánti.
«Murat Talǵatulyn balalarǵa kómek kórsetý úshin aýrýhanamyzǵa shaqyrtamyz. Keıde kúnine 2 ret, tipti, kún saıyn shaqyramyz», – dedi «Balalar shuǵyl medısınalyq járdem ortalyǵy» MKK bólim meńgerýshisi Meıirjan Qurmanálıev.
Murattyń aıtýynshy, bala ishinen tıyn alyp shyǵý qalypty jaǵdaıǵa aınalǵan. Alaıda búldirshin magnıt nemese sirke sýyn jutsa, ómirin saqtap qalý qıynǵa túsedi eken.
«Jaman nárse boldy. Qazir óńeshtiń kúıýimen aýrýhanaǵa kóp túsip jatady. Óńesh kúıse, tyrtyq qalyp, jabysyp, ota jasaýǵa deıin barady», – dedi balalar hırýrgi Murat Dúısebaev.
Talaı jandy aman alyp qalǵan hırýrg ata-analardyń da balasyna beıjaı qaramaýyn suraıdy. Ol maıda-shúıdeniń ózi talaıdyń taǵdyryn talqandap, balaǵa zar qylǵanyn aıtty.