Ulaǵatty ustaz Órik Imanǵojına týraly bir úzik syr
Elimizde ádiletti qoǵam qurý baǵytynda aýqymdy saıası-áleýmettik, ekonomıkalyq reformalar qarqyndy júrgizilýde. Búginde bilim, ǵylym, densaýlyq, turmys sapasy, mádenıet, tarıh, ádebıet syndy qundylyqtarymyzdy qadir-qasıetimen damytý úzdiksiz, jan-jaqty júrip jatqanyna kýámiz. Solardyń ishinde bilim berý isinde zaman talabyna oraı jańashyldyqtar kóp – ulttyq bolmysymyzdyń sapasyn kóterý qyzmetinde myńdaǵan ustazdarymyz men pedagog-ǵalymdarymyz bilimniń búginge deıingi oń muralaryn jańashyldyqtarmen úılestire eńbek etýde. Osy qatardyń aldyńǵy legindegi pedagog-ǵalymdarymyzdyń biri – Órik Imanǵojınanyń da ultqa qyzmeti erekshe.
Memleket basshysy Qasym-Jomart Toqaev «Urpaqqa bilim berý – ultqa qyzmet etý. Ustaz – uly esim» dep tujyrymdaǵandaı, osynaý uly esimniń ıeleri kimder dese, men eń aldymen Órik Zaınýllaqyzyn atar edim. Onyń pedagogıkalyq eńbek joly – bastaýysh mektep muǵaliminen bastalyp, aýdandyq ádisker-ınspektor, oblystyq bilim basqarmasy bastyǵynyń orynbasary, mektep dırektory, QR Bilim jáne ǵylym mınıstrliginiń orta bilim berý basqarmasy bastyǵynyń orynbasary, Oqýlyqtyq ádebıetti monıtorıńileý ortalyǵynyń basshysy, respýblıkalyq «Oqýlyq» ǵylymı-ádistemelik ortalyq dırektorynyń orynbasary, kolej dırektory, JOO oqý-ádistemelik bóliminiń tóraıymy, ýnıversıtet prorektory jáne rektory, «Qazaqstannyń ǵalym áıelderi» qoǵamdyq birliktiń vıse-prezıdenti laýazymdaryna jalǵasty. Osy ustazdyq eńbek jolynyń ózi-aq Órik Zaınýllaqyzynyń ulylyqqa laıyq pedagog ekenin aıǵaqtap tur dep oılaımyn.
Keıipkerimizdiń ǵylymı joly da tolassyz órleýmen erekshelenedi. «Bilim berýdi aqparattandyrý jaǵdaıynda oqýshylardy kásibı baǵdarlaý ádistemesi» degen taqyrypta pedagogıka ǵylymynyń kandıdaty dárejesin alǵan ol mejelegen jańashyldyǵyn kúni búginge deıin jalǵastyrýda. Bul baǵdaryn «Jańa aqparattyq pedagogıkalyq tehnologıalardy jasaý jáne oqý-ádistemelik ádebıettiń sapasyn dıagnostıkalaý» dep atalatyn zertteýler kesheninde odan ári damytyp, barlyǵy 150-deı eńbekterin jarıalady. Bilim berý keshenin jetildirý aıasyndaǵy zertteýlerdiń bel ortasynda júrdi. Oqýlyq qurylymyn saraptaýdyń negizgi kórsetkishterin anyqtap, fýnksıalaryn aıqyndady. Álem elderiniń oqýlyqtarymen salystyrma saraptama jasaldy. Halyqaralyq oqýlyqtardyń oqýshy tulǵasyna baǵyttalý ıkemdiliginiń aqıqattyq sıpattary baǵdarǵa alyndy. Bul máselelerdiń qazaqstandyq oqýlyqtarǵa qatystylyǵy boıynsha el Prezıdentine usynystar berildi. Osy jumystardyń barlyǵynyń basy-qasynda Órik Imanǵojına júrdi. Onyń 9, 11, 12-synyptarǵa arnalǵan «Rýsskaıa slovesnost oqýlyǵy, «oqýlyqtar men oqý-ádistemelik keshender sapasyn monıtorıgileý» eńbegi, «Salaýatty tamaqtaný mektebi» atty oqý quraly jáne taǵy basqa da shyǵarmashylyq týyndylary pedagogıkalyq qaýym tarapynan oń baǵaǵa ıe boldy. Sala boıynsha Otanymyzdyń ıgiligine, urpaq bolashaǵyna jasaǵan eńbegi oń baǵalaryn aldy, bireý bilip, bireý bilmeıtin marapattary óz aldyna úlken bıiktik der edim.
Bilimdi urpaq tárbıeleý – ár ustazdyń ultqa minsiz qyzmet etý mısıasyndaǵy uly mindeti. Bul rette Órik Zeınýllaqyzy qazaq halqynyń qymbatty, asyl tulǵalyq qundylyqtaryn óz eńbegi arqyly tanytqan jan. Ol kisimen ushyrasqan adamnyń sózine jylý, júzine nur darıdy. Iaǵnı kisimen qarym-qatynasta ádepti, ınabatty sabyrmen, kishipeıil ulylyǵymen tanylǵan. Sóıte tura, ult múddesin barlyq faktorlardan joǵary qoıatyn prınsıpshildigi erekshe. Búgingi jetpis bes jasynda pedagogıkalyq baı, ozyq tájirıbelerin jas urpaqqa tárbıeli bilim berýde áli de paıdalanýǵa bolatyny Órik Zeınýllaqyzyna kúsh-qýat beredi dep senemin, shyǵarmashylyq tabysqa jete bersin deımin. «Tar adam talasyp júrip tozady, keń adam keńesip júrip ozady» degen halyq maqalynyń danalyǵy turǵysynan aıtsam, ulaǵatty ustazdyń adal peıili, abyroıly eńbegi men óziniń ár isin elmen keńesip atqaratyn keńdigi keıingi pedagog jastarymyzǵa taǵylym bolar úlgi-ónege der edim.
.