Bilim salasynda bir jylda ne ózgerdi?

Elimizdiń túrli baǵyttardaǵy tabystarǵa jetý múmkindigi adamı kapıtaldyń sapasyna tikeleı baılanysty, sondyqtan Qazaqstanda bilim berý men densaýlyq saqtaý salalaryn damytýǵa aıyryqsha kóńil bólinip keledi. QR Prezıdenti Qasym-Jomart Toqaev óziniń «Ádiletti Qazaqstan: bárimiz jáne árqaısymyz úshin. Qazir jáne árdaıym» atty saılaýaldy baǵdarlamasynda atalǵan salalardy nyǵaıtýǵa baǵyttalǵan bıik maqsattardy aıqyndap berdi.

Úkimettiń baspasóz qyzmeti Memleket basshysynyń saılaýaldy baǵdarlamasyn iske asyrý aıasynda QR Úkimetiniń bilim jáne densaýlyq saqtaý salalaryn damytý boıynsha bir jyl ishinde atqarǵan jumysyna sholý jasady6 dep habarlaıdy almaty-akshamy.kz. 

1 qyrkúıekten bastap Qazaqstanda aı saıynǵy memlekettik shákirtaqy kólemi: bakalavrıat stýdentterine – 20%-ǵa, magıstratýra men doktorantýrada oqıtyndarǵa – 15%-ǵa, TjKB stýdentterine – 50%-ǵa artty. Jalpy, 2025 jylǵa qaraı stýdentter shákirtaqysynyń mólsheri 2020 jylǵy deńgeıden kezeń-kezeńmen 2 esege ósedi.

JOO-lar men kolejderdiń jataqhanalarynda oryn tapshylyǵy bir jyl ishinde 3 esege jýyq, 2022 jylǵy 62,8 myń tósek-orynnan bıylǵy qazan aıynda 23,9 myńǵa deıin qysqardy. 2023 jyly 10,9 myń oryndyq 44 jataqhanany iske qosý josparlanǵan, onyń ishinde 25 jataqhana paıdalanýǵa berildi. Jyl sońyna deıin taǵy 19 jataqhanany paıdalanýǵa berý josparlanyp otyr.

1 qyrkúıekten bastap respýblıkadaǵy barlyq 1-4 synyp oqýshylary úshin tegin ystyq tamaq uıymdastyryldy. 1,4 mln bala qamtyldy. Jergilikti búdjetten 25 mlrd teńge bólindi. Sondaı-aq halyqtyń áleýmettik álsiz toptarynyń 5-11 synyptarda oqıtyn 200 myńnan astam oqýshysy tamaqtanady. Sonymen qatar mektepke deıingi bilim berý uıymdarynda atalǵan sanattaǵy 97 myńnan astam bala tegin tamaqpen qamtamasyz etildi.