Sybaılas jemqorlyqqa qarsy is-qımyl agenttiginiń resmı ókili Danıar Begaıdarov 15 aıda 14 mlrd teńgeden astam shyǵyn keltirgen bilim salasyndaǵy júıeli sybaılas jemqorlyq táýekelderi týraly málimdedi, dep habarlaıdy almaty-akshamy.kz.
Onyń aıtýynsha, bilim berý salasynda 2023 jyldan bastap aǵymdaǵy jyldyń birinshi toqsanyna deıin eńbekaqy tóleý qorynan qarajat urlaýmen baılanysty turaqty qylmystyq sqemalar ashylǵan.
"Býhgalterler ulttyq bilim berý bazasy, mekteptiń býhgalterlik esep júıeleri jáne klıentterdiń qazynashylyq júıesi arasyndaǵy ıntegrasıanyń joqtyǵyn paıdalandy. Olar tólem qujattaryna qolmen túzetýler engizip, búdjet aqshasyn urlady. Jymqyrýshylyq jyl saıynǵy búdjettik ótinimderdi qalyptastyrý kezinde de iske asqan", - dedi spıker.
Danıar Bıgaıdarovtyń aıtýynsha, mundaı jymqyrý sqemasymen olar belgilengen normadan joǵary jalaqy alyp júrgen. Bógde tulǵalardyń derektemeleri boıynsha ózderiniń shottaryna bógde adamdardyń jalaqylaryn eseptegen. Sonymen qatar, "qaıtys bolǵan" adamdarǵa jalaqy eseptegen.
"Agenttik bilim berý salasynda osyndaı 206 qylmystyq isti tirkedi. Olar boıynsha zalal 14 mlrd teńgeden asty. Jalpy, urlyqtyń eń úlken somasy Túrkistan, Jetisý, Qyzylorda, Almaty, Aqtóbe oblystary men Almaty qalasynda anyqtaldy. Urlaý faktileri tekserilýde. Mysaly, jaqynda ǵana Jetisý oblysyndaǵy sybaılas jemqorlyqqa qarsy qyzmet Sarqan aýdanynyń búdjettik bilim bólimi basshysynyń zańsyz qyzmetin toqtatty. Ol osy bólimniń býhgalterleriniń shottaryna artyq belgilengen jalaqyny zańsyz aýdarý arqyly 1 mlrd teńge somasynda asa iri mólsherde búdjet qarajatyn urlady dep kúdiktelýde", - dep tolyqtyrdy ol.
Antıkordyń málimetinshe, tergeý áreketteri kezinde 156 mln teńge somasynda aqshalaı qarajat tabylyp, tárkilendi. Kúdikti sottyń sanksıasymen qamaýǵa alyndy. Osy is boıynsha tergeý jalǵasýda.
"4 sáýirde Jańaqorǵan aýdandyq sotynyń óńirdegi bilim bóliminiń basshysy Ibragımovqa, MM bas býhgalteri Aıazbaevaǵa jáne 24 mektep býhgalterine qatysty úkimi kúshine endi. Olar jalpy somasy 1 mlrd teńgeden asa iri mólsherde búdjet qarajatyn urlaǵany úshin kináli dep tanyldy. Sot úkimimen mekemeniń basshysyna, býhgalterlerine 8 jyl bas bostandyǵynan aıyrý, býhgalterlerdiń birine – jas balanyń asyraýynda bolýyna baılanysty 5 jyl merzimge jazasyn keıinge qaldyra otyryp, 7 jyl bas bostandyǵynan aıyrý jazasy taǵaıyndaldy. Sonymen qatar sottalǵandar memlekettik qyzmette jáne ózge de uıymdarda qyzmet atqarý quqyǵynan ómir boıyna aıyrylady", - dep túıindedi Danıar Bıgaıdarov.