Bilim jáne ǵylym birinshi vıse-mınıstri Sholpan Karınova ulttyq biliktilik testin tapsyrý kezinde qaıtys bolǵan pedagog jaıly pikir bildirdi, dep habarlaıdy Almaty-akshamy.kz.
«Almatylyq áriptesimizdiń otbasy men jaqyndaryna kóńil aıtamyn. Bilim jáne ǵylym mınıstrligi telegramma joldady. Almaty qalalyq bilim basqarmasy marqumnyń otbasyna qajetti kómek kórsetedi. Áriptesimizdiń sozylmaly dertke shaldyqqany jáne onyń júrek aýrýy boıynsha esepte turǵany belgili. Bilim salasynyń ókilderi áriptesimizdiń týystarynyń úıine barǵanda onyń sońǵy kezderi ózin nashar sezinip júrgenin, testileý kúni tańerteń de ózin jaısyz sezingenin aıtqan. Jaqyndary úıde qalýǵa keńes bergen. Esterińizge sala keteıin, muǵalimder densaýlyǵy nasharlap, ózin nashar sezingen jaǵdaıda testileýge barmaýyna nemese kúnin basqa merzimge aýystyrýyna bolady. Mundaı múmkindik qarastyrylǵan» dep jazdy Sholpan Karınova Facebook paraqshasynda.
Aıta keteıik, pedagog alǵash ret 2020 jylǵy 1 qyrkúıekten bastap muǵalim qyzmetin atqara bastaǵan. Sondyqtan jańadan kelgen muǵalim retinde ol sanatsyz jumys istedi jáne oǵan attestasıadan ótý mindetti bolmady.
«Bizdiń aqparatymyzǵa sáıkes, pedagog ózin saýatty, talantty ustaz retinde tanytqan. Týystarynyń aıtýynsha, ol óz bilimine senimdi bolǵan. Sol sebepti UBT-ǵa merziminen buryn jazylǵan. Osyndaı qaıǵyly jańalyqtardy paıdalanyp, áleýmettik jelilerde muǵalimderdiń óz-ózine qol jumsaýynyń birneshe oqıǵasy týraly feıkter kóptep taralyp jatyr. Bul - jalǵan aqparat» deıdi Sholpan Karınova.
Eske sala keteıik, Almatyda ulttyq biliktilik testin tapsyryp jatqan muǵalim kóz jumdy. Keıinnen testileý kezinde qaıtys bolǵan muǵalimniń júrek aýrýymen esepte turǵany belgili boldy.