2023 jylǵy 30 qyrkúıekte Abaı ýnıversıtetinde 2008-2017 jyldar aralyǵynda Abaı atyndaǵy QazUPÝ-dy basqarǵan belgili ǵalym-pedagog, akademık S.Pralıevti eske alýǵa arnalǵan «Bilim berý strategıalary: bolashaq kadrlardy daıarlaý» halyqaralyq pedagogıkalyq forým ótti.
Forýmǵa Abaı atyndaǵy QazUPÝ rektory Bolat Tilep, QR Ǵylym jáne joǵary bilim vıse-mınıstri Darhan Ahmed-Zakı, Almaty qalasy Mádenıet basqarmasynyń basshysy Ǵanı Maılybaev, elimizdiń memleket jáne qoǵam qaıratkerleri, qazaq zıalylarynyń kórnekti ókilderi, otandyq jáne sheteldik ǵalymdar qatysty.
İs-shara S.J.Pralıevtiń ǵylymı eńbekteri kórmesiniń ashylýymen bastalyp, otbasynyń demeýshilik qoldaýymen akademık S.Pralıev atyndaǵy konferens-zaldyń saltanatty ashylýymen jalǵasty.
Forýmdy rektor Bolat Tilep ashyp, is-sharanyń mańyzdylyǵyn, ǵalymnyń búkil sanaly ǵumyryn bilim berý júıesin jetildirýge jáne joǵary bilikti kadrlar daıarlaýǵa, sondaı-aq jalpy qazaqstandyq ǵylymdy damytýǵa qosqan úlesin erekshe atap ótti.
Vıse-mınıstr Darhan Ahmed-Zakı el Úkimeti men QR Ǵylym jáne joǵary bilim mınıstrliginiń quttyqtaý hatyn oqyp berdi. Forýmnyń mańyzdylyǵyn aıta kele, mundaı sharalar elimizdiń tarıhy men ozyq dástúrin dáripteýge, urpaqtar sabaqtastyǵyn saqtaýǵa qyzmet etetinin aıtty.
Forým barysynda «Akademık S.Pralıev: ómirlik joly jáne ǵylymı jetistikteri» beınefılmi kórsetilip, ǵalymnyń ómiri men shyǵarmashylyǵyna arnalǵan kitaptardyń tusaýkeser rásimi ótti. İs-shara «Úzdik ǵylymı basylym» konkýrsynyń jeńimpazdaryn marapattaýmen aıaqtaldy.
Halyqaralyq forým bilim berýdi damytý jáne bolashaqqa pedagogıkalyq kadrlar daıarlaý strategıalaryn talqylaý úshin otandyq jáne sheteldik sarapshylardyń basyn qosty. Forým aıasynda «Qazaqstanda pedagogıkalyq bilim berýdi ǵylymı-zertteýshilik súıemeldeý men tujyrymdaýǵa suranys» taqyrybynda paneldik pikirtalas; «Mektep pen ýnıversıtet dıalogy: jaratylystaný-geografıalyq sıkl pánderin oqytý ádistemesin jańartý» taqyrybynda dóńgelek ústel, bilim berý men ǵylymnyń negizgi máseleleri talqylanǵan zertteý toptarynyń otyrystary, sondaı-aq úzdik oqytýshylardyń sheberlik synyptary ótti.