Qazaqstandyq bılárdshy Ernar Shymbaev «Erkin pıramıda» boıynsha álem chempıony atandy.
Bılárd týrnıri 28 tamyz kúni Hanty-Manskııde ótti. Jartylaı fınalda jerlesimiz belarýs eliniń sportshysy Vladıslavty 7:5 esebimen jeńip, al sheshýshi kezeńde úsh dúrkin álem chempıony, reseılik Nıkıta Lıvadtan basym tústi. Dúbirli dodada álemniń 19 elinen 58 er men 16 áıel baq synaǵan.
Ernar Shymbaev – halyqaralyq dárejedegi sport sheberi. Karerasyn 2007 jyly bastaǵan sportshy 2010 jyly álem chempıony atanǵan. Keıingi jyldary Qazaqstan chempıonattarynyń birneshe dúrkin chempıondyǵyn jeńip aldy. Ernar Shymbaev sportqa alǵash qadam basqan kúnderin bylaı eske aldy:
– Bala kezimizden bılárdqa qyzyǵyp óstim. Keıin úlken sportqa qadam bastym. Trener izdeı bastadym. Birinshi ret Qazaqstan chempıonatyna Shymkent qalasyna bardym jáne sol jaqtan trener taptym. Birinshi trenerim Aleksandar Sadyrın degen kisi boldy. Sol kisiden 3 aı sabaq aldym, oıynnyń erejesin úırendim. Bul endi óte juqa sport, qyry kóp, onyń bárin bilý múmkin emes. Biz bilmeıtin neshe túrli nárse bar, – deıdi Ernar.
Osy jolǵy chempıonatqa ulttyq quramamen birge attana almaǵan sportshy jarysqa óz qarjysymen baryp, tek jeńisten úmittengenin aıtady:
– Birinshi ret 2010 jyly birden álem chempıonatynda jeńiske jettim. 2013 jyly Qazaqstanda jeńimpaz boldym. Qazir jasym 33-ke keldi. Negizi, bul jas bılárdqa ardager jas bolyp sanalady. 35 jasqa deıin oınaýǵa bolady.
24–28 tamyz aralyǵynda ótken álem chempıonatynda utyp keldik. Ulttyq quramaǵa joldama ala almaǵanym maǵan úlken motıvasıa boldy. Chempıonatta bar oıym oıynda emes, jeńiske jetýde, jeńilsem, jaqyndaryma ne aıtam degen oıda boldym. Bul maǵan jeńiske jetýime úlken kómek boldy. Qazaqstan bılárd federasıasyna da alǵysymdy bildiremin, – deıdi chempıon.
Ernar Shymbaev bılárdtyń da ózge de sport túrleri syndy óz qıyndyqtary men qyzyqtary bar deıdi. Aıtýynsha, bul sport túri de belgili bir daıyndyqty qajet etedi:
– Bılárdty bári qumar oıyn dep oılaıdy. Aqshaǵa oınaıdy degen syndy. Barlyq sportta ondaı nárse bar. Bılárd – bul da sport. Bul jerde de adam terleıdi, sharshaıdy degen syndy. Oǵan da ózindik daıyndyqtar kerek. Men kóbine júzýdi bılárd oıyndaryna jaqsy kómektesedi dep oılaımyn. Sebebi, bılárdta 5-6 saǵattap bir turyspen oınaımyz. Buǵan dene daıyn bolý kerek. Sondaı-aq, saıystyń aldynda demalys qajet. Kem degende 8 saǵattyq tolyq uıqy kerek. Sebebi, bılárd shahmat oıyndary syndy mımen jumys isteıtin oıyn. Eń bastysy, geometrıany jaqsy bilgen abzal. Jalpy aıtqanda, bılárd adamdy tárbıeleıdi desek te bolady, – deıdi Shymbaev.
Reseı tórinde elimizdiń kók baıraǵyn jelbiretken sportshy bolashaqta balalarǵa arnalǵan tegin bılárd mektebin ashýdy kózdeıdi. Jas býynǵa ózimniń ustanymdarym men bılárd oıyndarynyń qyr-syryn úıretsem deıdi.
– Qazirgi tańda jasóspirimder arasynda sport túri damymaı jatyr. Ol úshin arnaıy mektepter ashyp, áke-sheshelerine túsindirip, jasóspirimderdi tartý oıda bar. Halyqtyń bılárdqa degen oń kózqarasyn qalyptastyryp, shákirt tárbıelesem deımin. Bolashaqta úlken bılárd mektebin ashqym keledi. Jáne múmkindiginshe tegin etip ashsam ba deımin, – deıdi sportshy. Bılárd sport federasıasy Ernar Shymbaevty álem chempıony atanýymen arnaıy quttyqtap, sportshynyń ketken shyǵyndaryn tolyq ótep beretinin jetkizdi:
– Ernar chempıonatqa attanar aldyna ózine jeńiske jetetinin basa aıttym. Óıtkeni, jeńisine senimdi boldym. Jarysqa attanar aldynda jeńetinie jorıtyn tús kórgen edim. Ernar – maqtan tutatyn myqty, jigerli sportshymyz. Ulttyq quramaǵa ene almasa da, taısalmaı ózi attanǵan bolatyn. Mine, búgin álem chempıony atanyp otyr. Shyn júrekten quttyqtaımyz, – dedi Qazaqstan bılárd federasıasynyń tóraǵasy Ańsary Qaraneev.
