Chempıonattyń júlde qory - 66 000 AQSH dollary.
Qazaq shahmatshysy, áıelder arasyndaǵy halyqaralyq grosmeıster Bıbisara Asaýbaeva jyldam shahmattan áıelder chempıonatyna (Women's Speed Chess Championship) joldama aldy, dep habarlaıdy Almaty-akshamy.kz Mádenıet jáne sport mınıstrliginiń baspasóz qyzmetine silteme jasap.
Jyldam shahmattan álem chempıonaty - ylǵı myqtylar qatysatyn jáne onlaın formatta ótetin osy jyldyń basty básekesi.
28 mamyrda bastalǵan irikteý kezeńi 6 maýsymǵa deıin jalǵasady. Al negizgi báseke 10 maýsymda bastalyp, 3 shildede aıaqtalady. Chempıonattyń júlde qory 66 000 AQSH dollary.
IM Bıbisara Asaýbaeva óziniń qaısarlyǵy men jigeriniń arqasynda úshinshi múmkindiginde joldamaǵa ıe boldy. Otandasymyz aldyńǵy chempıonattarda pleı-offtan ary asa almaǵan.
Ár irikteý kezeńi 21 aınalymnan turatyn shveısarıalyq júıe boıynsha (ýaqytty baqylaý 1+1) jáne segiz jeńimpazdyń arasynda ótetin nokaýttan turady. Kelesi irikteý jarysy búgin, 3 maýsymda, ótedi.
Aıta keteıik, chempıonat 16 shahmatshynyń arasynda ótedi. Erterek joldama alǵan segiz shahmatshy arnaıy shaqyrylǵan segiz oıynshymen kezdesedi. Shaqyrtý alǵandar: GM Hampı Konerý (Úndistan), GM Aleksandra Kostenúk (Reseı), GM Antoaneta Stefanova (Bolgarıa), GM Anna Mýzychýk (Ýkraına), GM Irına Krýsh (AQSH), GM Katerına Lagno (Reseı), GM Leı Tınsze (Qytaı).
Jankúıerler FIDE áıelder chempıonatyn, Chess.com/TV jáne Twitch Chess.com. arnasynan sarapshylardyń túsindirmesi arqyly tamashalaı alady.
