Elimizde oqýshylardyń mindetti mektep formasyna qoıylatyn talaptarǵa ózgerister engizilip, buıryq jobasy daıyndaldy.
Bul týraly QR Bilim jáne ǵylym mınıstrligi mektepke deıingi jáne orta bilim komıtetiniń tóraǵasy Gúlmıra Kárimova málim etti, dep habarlaıdy Almaty-akshamy.kz QazAqparatqa silteme jasap.
«Jańa oqý jylyna daıyndyq jazdygúni bastalady. Balany mektepte daıyndaýda ata-anany oılandyratyn jaıttyń biri — mektep formasy. Kóptegen ata-ana mektep formasyn sapaly ári qoljetimdi baǵamen satyp alǵysy keledi. Búgingi tańda mindetti mektep formasyna qoıylatyn talaptarǵa ózgerister engizilip, buıryq jobasy daıyndaldy. Ata-ana ózi qalaǵan mektep formasyn erkin tańdaı alady. Barlyq óńirdegi bilim basqarmalary men bólimderi ata-analarǵa mektep formasyn tańdaýda biryńǵaı tústi usynady», - dedi Gúlmıra Kárimova QR Bilim jáne ǵylym mınıstrliginiń aparattyq jınalysynda.
Onyń aıtýynsha, mektep formasynyń bala tárbıesine áseri bar.
«Mektep formasyna emblema basqa da mektep belgilerin japsyrýǵa bolady. Sapaly ári qoljetimdi mektep formasymen qamtamasyz etýdegi jańa tásil oqýshylar arasyndaǵy áleýmettik, múliktik jáne ózge de aıyrmashylyqtardy joıady dep esepteımiz», - deıdi ol.
Buǵan deıin komıtet basshysy oqýshylardy teatr ónerine tartýǵa arnalǵan pılottyq joba týraly aıtqan edi.