Abaı oblysynyń Besterek aýylynda tamyz aıynda bolǵan qaıǵyly jol apatynan keıin komada jatqan 9 jastaǵy Aızere Dáýlet qaıtys boldy, dep habarlaıdy Aqshamnews.kz tilshisi. Bul týraly oblystyq densaýlyq saqtaý basqarmasy málimdedi.
Vedomstvonyń habarlaýynsha, qyz bala shamamen bir aıǵa jýyq ýaqyt es-tússiz jatqan.
"26 qyrkúıek saǵat 15:30-da Aızere Daýletke bıologıalyq ólim dıagnozy qoıyldy. Qyzdyń jerleý rásimi 29 qyrkúıekte ótti. Ata-anasynyń ótinishi boıynsha basqa aqparat jarıalanbaıdy", – delingen basqarma taratqan málimette.
Besterektegi jol apaty týraly ne belgili?
19 tamyzda Besterek aýylynda Toyota kóliginiń 55 jastaǵy júrgizýshisi úıdiń qaqpasy janynda, joldan 10 metr qashyqtyqta turǵan balalardy qaǵyp ketken. Oqıǵa ornynda eki bala, taǵy biri aýrýhanaǵa bara jatqan jolda kóz jumǵan. Úsh bala túrli jaraqatpen aýrýhanaǵa jetkizilgen.
Qaza bolǵan balalardyń jasy 2-den 7 jasqa deıin, jaraqat alǵandar 6 men 9 jas aralyǵynda bolǵan.
Jol apatynan keıin Prezıdent Qasym-Jomart Toqaev zardap shekken balalarǵa kómek kórsetý úshin dárigerler otyrǵan arnaıy ushaq jiberýdi tapsyrǵan. Arnaıy bort Úrjar aýdanyna baryp, eki balany sanıtarlyq avıasıa arqyly Astanaǵa jetkizdi.
Jaraqat alǵan 6 jasar ul bala aýyr jaraqattan keıin reanımasıadan jalpy palataǵa aýystyrylǵan. Al 9 jastaǵy Aızere Dáýlet Abaı oblysynyń aýrýhanasynda aýyr halde jansaqtaý bóliminde jatqan edi.
Abaı oblysynyń ákimi Berik Ýálı qaza tapqan balalardyń otbasyna barlyq qajetti kómek kórsetýdi tapsyrdy.
Polısıanyń málimetinshe, kólik júrgizýshisi ustalyp, ýaqytsha ustaý ızolátoryna qamalǵan. Saraptama onyń oqıǵa kezinde mas bolmaǵanyn kórsetti. Qylmystyq is qozǵaldy.