Almaty – múmkindikter qalasy. Munda sapaly bilim alýǵa, jaqsy jumys tabýǵa, kásip bastaýǵa jáne ómir súrýge barlyq jaǵdaı jasalǵan. Degenmen, qalada baspana máselesi árqashan ózekti. Ásirese jastar úshin Almatydan úı alý – úlken jetistik.
Qalada jas mamandar men jańadan otbasyn qurǵan jandar úshin baspanaly bolýǵa túrli baǵdarlamalar qarastyrylǵan. Osyndaı múmkindikti paıdalanǵan jastardyń biri – Almaty elektromehanıkalyq kolejiniń oqytýshysy Tuńǵyshbaı AMANHAN.
Ol 2020 jyly «Nurly jer» baǵdarlamasy arqyly satyp alý quqyǵynsyz beriletin jaldamaly páterge ıe bolǵan. Alǵashynda Alataý aýdany, «Aqkent» yqshamaýdanyndaǵy eki bólmeli páterde turǵan jas otbasy bes jyl ishinde óz baspanasyna qarajat jınaýǵa múmkindik alǵan.
– Ol kezde jańa ǵana úılengen jas jubaılar edik. Baǵdarlamanyń arqasynda aı saıyn nebári 11-12 myń teńge ǵana tólep turdyq. Eger qarapaıym jaldamaly páterde turatyn bolsaq, 150-180 myń teńge tóleýimizge týra keler edi. Únemdelgen qarajatty Otbasy bankindegi depozıtke jınadyq. Nátıjesinde «Almaty jastary» baǵdarlamasy arqyly 18 mıllıon teńgege jeke úı aldyq. Qazir úsh balanyń ata-anasymyz, – deıdi Tuńǵyshbaı Amanhan.
Jas maman memleket usynǵan múmkindikterdi tıimdi paıdalanyp, óz armanyna qol jetkizgenin atap ótti.
– Bul baǵdarlama bizge úlken kómek berdi. Eger jaldamaly páterge kóp aqsha jumsasaq, úı alýǵa múmkindik bolmas edi. Shyn nıettengen adam maqsatyna jetedi eken. Armandar oryndalady! – deıdi ol.
Tuńǵyshbaı Amanhannyń eńbekqorlyǵy – kóptegen jas otbasylarǵa úlgi. Bastysy – maqsat qoıyp, berilgen múmkindikterdi paıdalana bilý. Búginde Almatyda jastarǵa arnalǵan «Almaty jastary», «Baqytty otbasy», «Shańyraq» syndy baspana baǵdarlamalary jumys isteıdi. Bul baǵdarlamalar arqyly baspanaly bolýǵa árbir jastyń múmkindigi bar.
Almatydan úı alý – kóptegen jandardyń armany. Bastysy – maqsat qoıyp, júıeli túrde áreket etý. Memleket usynǵan múmkindikterdi tıimdi paıdalana bilgen árbir jas óz baspanasyna qol jetkize alady. Eger siz de Almatydan úı alýdy armandasańyz, turǵyn úı baǵdarlamalary týraly aqparat alyp, durys jospar qurýdy búginnen bastańyz.