Kórsetilimge bıletter birneshe kún buryn satylyp ketken
Halyqaralyq Berlın kınofestıvaliniń «Forým» baǵdarlamasy sheńberinde QR Mádenııet jáne sport mınıstrligi tapsyrysy boıynsha «Ulttyq kınony qoldaý memlekettik ortalyǵy» qoldaýymen Sháken Aımanov atyndaǵy «Qazaqfılm» AQ túsirgen «Aqyn» fılminiń eýropalyq tusaýkeseri ótti, dep habarlaıdy Almaty-akshamy.kz Egemen.kz-ke silteme jasap.
Aıta ketsek, fılmniń rejıseri atalǵan kórsetilimge qatysa almady, alaıda sheteldik kórermenderge otandyq týyndyny prodúser Iýlıa Kım jáne aktrısa Gúljan Túzelbaeva tanystyrdy.
«Fılmniń tusaýkeserine qatysyp otyrǵanymyzǵa óte qýanyshtymyz. Uıymdastyrýshylarǵa alǵysymyz sheksiz. Rejıser Dárejan Ómirbaev búgingi belgili sebepterge baılanysty kórsetilimge qatysa almady. Meniń oıymsha shynaıy ónerge berilgen jandar bul fılmnen ózderin kóre alady. Men fılmdegi basty keıipker obrazynan rejıserdiń ózin kórip turǵandaı bolamyn. Osy kınotýyndynyń jaryq kórýine atsalysýǵa múmkindik bergen Dárejan Ómirbaevqa alǵysymdy bildiremin», - dedi kórsetilim aldynda Iýlıa Kım.
Qazaqstandyq kınotýyndy Berlın kınofestıvali kórermenderiniń qyzyǵýshylyǵyn týdyrǵanyn aıta ketý kerek. Bul kórsetilimge bıletter birneshe kún buryn satylyp ketken eken. Tusaýkeserge kelgen qonaqtardyń arasynda Dárejan Ómirbaevtyń shyǵarmashylyǵymen burynnan tanys kórermender de boldy.
«Aqyn» fılmi tehnologıalar damyǵan qazirgi zamanda ónerdiń qoǵamda alatyn orny týraly oı qozǵap, poezıaǵa suranys azaıǵan dáýirde aqynnyń kúıinishi týraly syr shertedi. Qazaq halqynyń XIX ǵasyrdaǵy eń kórnekti aqyndarynyń biri Mahambet Ótemisulynyń qıly taǵdyry jaıynda oıǵa batqan basty keıipker názik júrekti aqyndardyń ómiri qashan da qıyn bolǵanyn túsinedi. Fılmniń senarıi nemis jazýshysy German Gesseniń «Avtorlyq kesh» atty avtobıografıalyq áńgimesi jelisimen jazylǵan. Fılmdegi basty róldi «Jigitter» tobynyń ánshisi Erdos Qanaev somdaıdy.
Eske sala ketsek, atalǵan fılm Tokıoda ótken halyqaralyq kınofestıval sheńberinde alǵash kórsetilip, Dárejan Ómirbaev «Úzdik rejıser» júldesimen marapattalǵan bolatyn.