Germanıa astanasynda Dına Nurpeıisova atyndaǵy Atyraý akademıalyq halyq aspaptary orkestriniń konserti ótti.
Mádenı shara Qazaqstan men Germanıa arasynda dıplomatıalyq qatynastar ornaýynyń 30 jyldyǵyna arnaldy. Dına Nurpeıisova atyndaǵy Atyraý akademıalyq halyq aspaptar orkestri osyǵan deıin Fransıa, Avstrıa jáne Serbıada óner kórsetti, dep habarlaıdy Almaty-akshamy.kz 24.kz-ke silteme jasap.
Orkestr Konserthaýs sahnasynda óner kórsetti. Qazaq orkestrin tyńdaý úshin saıasatkerler, dıplomattar, kásipkerler men ónersúıer qaýym keldi. Qazaqstan men Germanıa arasyndaǵy dostyqtyń 30 jyldyǵyna arnalǵan konsertti Berlındegi elshimiz Nurlan Ońjanov pen Germanıa Syrtqy ister mınıstrliginiń ýákili Mattıas Lúttenberg ashty. Ónerpazdar Berlınge «Eýropadaǵy Uly dala áýenderi» dep atalatyn erekshe baǵdarlama ákeldi. Ujym kórermenniń nazaryna qazaq halyq mýzykasynyń týyndylaryn usyndy.
Merekelik keshti Túrkeshtiń «Kóńilashar» kúıi ashty. Osydan keıin bas dırıjer Bolat Doldashev basqarǵan orkestr Qurmanǵazy men Dına Nurpeıisovanyń áıgili kúılerin oryndap berdi.
«Konsert maǵan óte unady. Qazaq ulttyq aspaptarynyń mýzykalyq palıtrasyna tánti bolyp, halyq mýzykalaryńyzben tanystym. Orkestr óte joǵary deńgeıde oryndady. Aıta ketý kerek, Radeskıı marshyn estip, tań qaldym. Beıimdeýi óte qyzyq boldy», - deıdi GFR SİM Shyǵys Eýropa, Ońtústik Kavkaz jáne ortalyq Azıa elderimen yntymaqtastyq jóninde ýákili Mattıas Lúttenberg.
Dombyra, qylqobyz ben sherterdiń biregeı áýeni kórermendi baýrap aldy. Sondaı-aq olar solıserdiń ánshilik sheberligin joǵary baǵalady. Al nemis klassıgi Getemen baılanysty uly Abaıdyń mýzykasy tosyn syı boldy.
«Sheteldik kompozıtorlardan Shtraýstyń shyǵarmasyn oınadyq. Sosyn «Qarańǵy túnde taý qalǵyp» - Geteniń «Pesná nochnogo strannıka» dep atalatyn óleńin áýeli Lermontov orys tiline, odan ary qaraı Abaı Qunanbaev qazaq tiline aýdarǵan bolatyn. Mine, osy ándi búgin tartý retinde ala keldik», - deıdi Dına Nurpeıisova atyndaǵy akademıalyq qazaq halyq aspaptar orkestriniń basshysy Saǵyntaı Kópjasarov.
Kórermenge jıyrmadan asa týyndy usynyldy. Konsertti kúı tartysyn sheber oryndaǵan dombyrashylar aıaqtady. Kóremender kóshemet kórsetip, áritsterimizdi jibergisi kelgen joq. Sondyqtan olar sahnada qalyp, taǵy úsh shyǵarmany oryndap berdi.
Edýard Kınsbrýner, Germanıa ekonomıkasy shyǵys komıtetiniń óńirlik dırektory: - Berlınde qazaqtyń dástúrli mýzykasyn tyńdaýǵa múmkindik týyndaǵanda, men únemi qýana baramyn. Ásirese, ol osyndaı keremet zalda oryndalsa. Konsertke tánti boldym. Ásirese, dombyrashylar trıosy unady.
Atyraýlyq ártister Berlın turǵyndaryna umytylmas kesh syılady. Endi ónerpazdarymyzdy Tómengi Saksonıanyń ortalyǵy - Gannover qalasynda kútip otyr.