Búgin 80 jasqa qaraǵan shaǵynda belgili tarıhshy ǵalym, ustaz, tarıh ǵylymdarynyń doktory, profesor, Qazaq bilim akademıasynyń akademıgi Amangeldi Qusaıynuly Qusaıynov ómirden ozdy. Bul týraly Sh.Ýálıhanov atyndaǵy Tarıh jáne etnologıa ınstıtýtynyń dırektory, tarıh ǵylymdarynyń doktory, profesor Zıabek Qabyldınov facebook-tegi paraqshasynda jazdy.
«Qaraly habardy estigende qazaq tarıh ǵylymynyń taǵy bir betke ustar azamaty, elimizdiń qoǵamdyq ómirinde ózindik orny bar qaıratker tulǵa bul ómirden qaıtty-aý dep qabyrǵamyz qaıysty. Aǵamyzdy 1994 jyldan beri jaqsy biletinmin. Kezdeskende óziniń aǵalyq aqyl – keńesin berýden aıanbaıtyn. Biz týyp - ósken Omby oblysynda jetimder úıinde tárıbelengenin de aıtyp júrýshedi»,-dep jazdy tarıhshy.
Amangeldi Qusaıynuly 1942 jyly 29 jeltoqsanda Pavlodar oblysy Ertis aýdany Úlgili aýylynda dúnıege kelgen.
1960 jyly eńbek jolyn orta mektep muǵalimi bolyp bastaǵan ol, S.M. Kırov atyndaǵy Qazaq memlekettik ýnıversıtetin bitirip Almaty medısına ınstıtýtynda oqytýshy qyzmetinde istegen. Keıin partıa qyzmetine aýysyp Almaty qalasy Sovet aýdandyq komıtetiniń apparatynda, odan soń Qazaq memlekettik ýnıversıtetiniń aspıranty, asıstenti, aǵa oqytýshysy, dosent, prorektor, aǵa ǵylymı qyzmetker, profesor bolyp qyzmetterin atqarǵan. 1992-1996 jj. S.Seıfýllın atyndaǵy Aqmola ýnıversıtetiniń, 1996-2000 jyldary - L.N.Gýmılev atyndaǵy Eýrazıa ulttyq ýnıversıtetiniń rektory qyzmetin atqaryp, basshy retinde ýnıversıtettiń ǵylymı-pedagogıkalyq, materıaldyq – tehnıkalyq potensıalyn nyǵaıtýda úlken qaıratkerlik kórsetti.
2000-2004 jyldary QR Joǵarǵy attestasıalyq komısıasynyń tóraǵasy. 2004-2007 jyldary – Y.Altynsarın atyndaǵy Qazaq bilim akademıasynyń prezıdenti boldy. Al 2007 jyldan Eýrazıa gýmanıtarlyq ınstıtýtynyń rektory bolǵan edi. Qaı qyzmette bolmasyn bar ynta-jigerimen jumys istegen ol kisi ár qashan iskerliginmen, keremet uıymdastyrýshy basshy, qarapaıym azamat bola bildi.
Otandyq tarıh ǵylymynyń damýyna da úlken úles qosty. Eńbek etken jyldarynda kóptegen daryndy, izbasar-ákimshilerdi jáne jas shákirtter men ǵalymdardy tárbıeledi. Amangeldi Qusaıynulynyń jetekshiligimen «Otan tarıhy» mamandyǵy boıynsha tórt doktorlyq, on alty kandıdattyq dısertasıalar qorǵaldy.
Elimizdiń bilim jáne ǵylym salasyn damytýǵa qosqan úlesi úshin Eńbek Qyzyl Tý ordeni, KSRO Joǵary mektebiniń úzdigi, Qaz KSR Joǵarǵy Keńesi Prezıdıýmynyń Gramotasy, Qazaqstan Respýblıkasy Prezıdentiniń Qurmet Gramotasymen, basqa da medeldermen marapattalǵan. Kúresten – sport sheberi.
«Amangeldi Qusaıynuly úlkenge qurmet, kishige izet kórsete biletin, ózinen keıin ósip kele jatqan jas ǵalymdarǵa qamqor bola biletin ulaǵatty ustaz, adamgershiligi mol abyroıly azamat edi. Qabyrǵasy qaıysqan qalyń jurtshylyqqa qaza qaıyrly bolsyn. Aǵamyz Amangeldi Qusaıynulynyń endigi bara jeri – jumaq, ımany salaýat, qarańǵy qabiri – jaryq bolsyn! Kórmegen qyzyǵy men qýanyshyn artyndaǵy urpaqtaryna bersin! Alla aldynan jarylqasyn dep kóńil aıtamyz!»,-dep jazdy Qabyldınov.