Qazirgi kezde jol apatynyń mán-jaıy anyqtalyp jatyr
Talǵar aýdanynda bes birdeı kólik soqtyǵysty. Olardyń ishinde polısıanyń arnaıy patrúldik avtomashınasy da bar, dep habarlaıdy Almaty-akshamy.kz Sputnik Qazaqstanǵa silteme jasap.
Oblystyq polısıa departamenti usynǵan málimetke sáıkes, jol apaty búgin tańǵy saǵat 08:30-da bolǵan. Bes kóliktiń soqtyǵysqan sáti daladaǵy beınebaqylaý kamerasyna jazylyp qaldy.
«Subaru Legacy-diń 24 jastaǵy júrgizýshisi Almaty - Kókpek – Kóktal tas jolynyń 26-shaqyrymynda rólge ıe bola almaı, joldyń qarsy betine shyǵyp ketken. Sol kezde Kia Cadenza markaly patrúldik kólikke soǵyldy. Odan keıin ınersıamen Lada Largus, Subaru Outback pen Mitsubishi Galant-ty soqty», - deıdi polıseıler.
Jol apaty kezinde patrúldik kólikte bolǵan úsh polıseı ǵana zardap shekti. Olardy Esik qalalyq aýrýhanaǵa jetkizgen. Dárigerlerdiń kómeginen keıin barlyǵy úıine jiberildi.
Qazirgi kezde polıseıler jol apatynyń mán-jaıyn anyqtap jatyr.