Ol 1974 jyly Oral qalasynda dúnıege kelgen.
Áriptesteriniń jazýynsha, mýzykanttyń júregi toqtap qalǵan, dep habarlaıdy Almaty-akshamy.kz
Arman Dúısenov - belgili kompozıtor, mýzykant, ánshi, prodúser, telejúrgizýshi, talaı qazaqsha hıtterdiń avtory. Ony áriptesteri álemdik klasıkalyq mýzyka, fólklorlyq etnografıa, estradalyq mýzyka sıaqty birneshe baǵytta kásibı mýzykalyq bilim alǵan Qazaqstannyń zamanaýı kompozıtorlarynyń biri dep, joǵary baǵalaıdy.
Arman Dúısenovtiń, ásirese, Altynaı Jorabaeva oryndaıtyn «Aǵajan» áni men Dınara Qyryqbaeva shyrqaıtyn «Ustazym» áni kópke tanymal. Mektep oqýshylary «Ustazym» ánin áli de oryndap júr. Sonymen qatar kompozıtordyń «Fotograf», «Sen», «Máńgilikke», «Baqyt tańy», «Úmit arman», «Sen ǵana» ánderi de belgili.
Mýzykanttyń shyǵarmashylyq joly 1990 jyly Pavlodar qalasynda ótken XXII Respýblıkalyq jas oryndaýshylar baıqaýynda jeńimpaz atanǵannan keıin bastaldy. Sol jyly dırıjerler T.Ábdirashev pen Iý.Dorohovskııdiń jetekshiligimen sımfonıalyq orkestr quramynda Shveısarıa qalalary men Lıhtenshteın Knázdigine halyqaralyq gastróldik saparǵa qatysty. 1995 jyly «Dostar» pop-djaz-rok tobynyń jetekshisi bola júrip, Respýblıkalyq «Jas-Qanat» baıqaýynda «Halyq tańdaýy» syılyǵynyń ıegeri atandy. 1992-1996 jyldar aralyǵynda ol jyl saıyn Baıroıttegi (Germanıa) halyqaralyq Das Treffen festıvaline qatysady. Onda álemniń 42 eliniń ókilderi qatysatyn sımfonıalyq orkestrde úsh ret Gran-prı laýreaty jáne toptyń súıemeldeýshisi boldy.
1997 jyldan beri Qurmanǵazy atyndaǵy Qazaq ulttyq konservatorıasyn bitirgennen keıin Qazaqstan Respýblıkasynyń halyq artısi Raıymbek Seıtmetov negizin qalaǵan «Óner» fakúltetiniń «Mýzyka jáne oryndaýshylyq óner» kafedrasynda sabaq bergen. Sodan keıin Túrkistandaǵy Halyqaralyq qazaq-túrik H.A.Ýnıversıtetinde Asanáli Áshimov, Rahmanqul Berdibaev, Baǵybek Qundaqbaev, Áshirbek Syǵaevtarmen birge respýblıkalyq jáne halyqaralyq baıqaýlardyń laýreattary atanǵan jas talantty ánshiler men akterlardy tárbıeleýge atsalysty.