Alash qaıratkeri, qazaq ádebıetindegi tuńǵysh roman sanalatyn «Baqytsyz Jamal» jáne «Oıan, qazaq!» syndy súıekti shyǵarmalardyń avtory Mirjaqyp Dýlatulynyń soqtyqpaly-soqpaqty ǵumyry týraly fılm túsirgen rejıser Murat Esjan men ońtústikten soltústikke kóshti uıymdastyryp júrgen qoǵam belsendisi Býrahan Dahanǵa kásipker kólik tartý etti, dep habarlaıdy Almaty-akshamy.kz.
«Qazaq rýhanıatynyń altyn qoryna orasan qazyna qosqan, Alash qaıratkerleriniń el úshin atqarǵan eren eńbegin qaıta jańǵyrtyp, sapaly fılm túsirip kórermenge sáýleli dúnıe usynǵan Murat Esjan baýyrymyzǵa temir tulpar tartý etýdi jón sanadyq. Elimizdiń ońtústiginen teriskeıge kóshti bastap, azamattardyń soltústiktegi aýyldarǵa kóship barýyna qozǵaý salyp júrgen qoǵam belsendisi Býrahan Dahannyń eńbegi qandaı qurmetke de laıyq. Azamattar aldaǵy ýaqytta jańa kólikpen júrip, elimizdiń órkendeýine úlesin qosa berýine tileýlespiz», dedi kásipker Syrymbek Taý.
«Júk salǵyshtyń esigin ashý úshin kóliktiń ishinen eńbektep jetýshi edim, terezesi ashylsa jabylmaıtyn saldyrlaq kóligime esh ókpe joq. Saldyrlasa da osy máshınemen júrip te «Ahmet. Ult ustazy», «Oıan, qazaq!» serıaldaryn túsirdik. Syrymbek Taý myrza saltanatty sharaǵa shaqyrǵanda oıda túk joq kelip, kóligimdi qymbat máshınelerdiń qasyna qańtarýǵa uıalyp, qaltarystaý jerge qaldyryp ketip edim. Oılamaǵan jerden qurmet kórsetkeni, tosyn syı boldy rasynda», dedi Murat Nurákimuly.