Qazaqstan Respýblıkasy Energetıka vıse-mınıstri Álibek Jamaýov «Beıneý-Bozoı-SHymkent» magıstraldyq gaz qubyrynyń ekinshi jelisin salý josparlanǵan ýchaskege jumys saparymen bardy. Sapar maqsaty — energetıka salasyndaǵy elimizdiń iri ınfraqurylymdyq jobalarynyń biri boıynsha qurylys kezeńine daıyndyq barysyn baqylaý.
Sapar barysynda vıse-mınıstr qurylys-montaj jumystarynyń kezeńderimen tanysyp, merdiger uıymdardyń ókilderimen jumys keńesin ótkizdi. Sondaı-aq, olarmen logıstıka, tehnıkamen qamtamasyz etý jáne jergilikti atqarýshy organdarmen úılestirý máselelerin talqylady. Erekshe nazar jumys kestesiniń saqtalýyna, qurylys sapasyna jáne nysandardyń tehnıkalyq daıyndyǵyna aýdaryldy.
"Beıneý-Bozoı-SHymkent" gaz qubyrynyń ekinshi jelisin iske asyrý — elimizdiń energetıkalyq qaýipsizdigi úshin strategıalyq mańyzǵa ıe jáne otyn-energetıka kesheniniń ornyqty damýy salasyndaǵy memlekettik saıasattyń basym baǵyty», — dep atap ótti QR Energetıka vıse-mınıstri Álibek Jamaýov.
Joba eki kezeńde júzege asyrylady. Nátıjesinde gaz qubyrynyń ótkizý qabileti jylyna 15 mlrd tekshe metrge deıin artady. Bul elimizdiń ońtústik, ortalyq jáne soltústik óńirlerin turaqty gazben qamtamasyz etýge múmkindik beredi.
Aıta keteıik, joba Qazaqstan Respýblıkasy Úkimeti men Katar Memleketi Úkimeti arasyndaǵy kelisim aıasynda katarlyq ınvestormen birlesip júzege asyrylatyn bolady. Katarlyq ınvestorǵa Qazaqstan tarapynan jáne QazaqGaz kompanıasy arqyly jobany sátti iske asyrý úshin barlyq qajetti jaǵdaı jasalǵan.