Beıjiń Olımpıadasynyń bastalýyna sanaýly kúnder qaldy
Ulttyq Olımpıadalyq komıtettiń dereginshe, resmı túrde qysqy oıyndar 4 aqpanda ashylǵanymen, jarystar 2 aqpanda bastalyp ketedi, dep habarlaıdy Almaty-akshamy.kz
Sportshylar turaqtaıtyn olımpıadalyq aýylmen tanystyrady.
Olımpıadadaǵy aýyldar sany úsheý. Oıyn ótetin ár klasterde bir aýyldan bar. Bul sportshylarǵa yńǵaıly bolýy úshin jasalǵan qadam. Máselen, Iansınde synǵa túsetin sportshy jatyn ornyna jetý úshin uzaq ýaqyt joǵaltýy múmkin. Sondyqtan, Beıjiń, Iansın jáne Chjanszákoýda bir-birden olımpıadalyq aýyl salynady.
Úsh olımpıadalyq aýyldyń jalpy aýmaǵy – 330 myń sharshy metr. Sportshylardy 20 ǵımaratqa ornalastyrady. Keıinnen bul nysandar turǵyn úıge aınalyp, halyq ıgiligine beriledi. Uıymdastyrýshylar olımpıadalyq aýyldy ekologıalyq turǵydan taza jáne senimdi etip salýdy kózdegen.
Oıyndy uıymdastyrýshylardyń málimetinshe, olımpıadalyq aýyl jasyl qurylys standarttaryna tolyǵymen saı keledi. Iansındegi qurylys barysynda 130 jergilikti aǵash saqtalyp, olımpıadalyq ormanǵa 24 000 aǵash otyrǵyzyldy.
Olımpıadalyq aýyl tolyǵymen qytaı stılinde bezendilirgen. Bul oıyndy qabyldaýshy memleketti qatysýshylar jaqsy túsiný úshin jasaldy.
Iansındegi aýyl teńiz deńgeıinen 900 metr bıiktikte ornalasqan. Mundaǵy korpýstardyń barlyǵy da jylytylǵan dálizdermen jalǵastyrylǵan. Demek, sportshylardyń aıazda syrtta júrýine jol joq.
Bul aýylda negizinen taý shańǵysynyń ókilderi jaıǵasady. Olar joǵaryda ornalasqan jarys jolyna deıin arqan jolmen baryp, qaıtar jolda shańǵymen jetip alady.
Olımpıadalyq aýyldaǵy bólmeler ártúrli. Bir sportshyǵa, eki sportshyǵa arnalǵan bólmeler bar. Ár bólmede jylytqysh pen kondısıoner ornalastyrylǵan. Munyń bári smartfondaǵy qosymsha arqyly basqarylady.
Kereýetterdi bıiktigine, uzyndyǵyna qaraı retteýge bolady. Tokıomen salystyratyn bolsaq, mundaǵy kereýetter kartonnan jasalmaǵan.
Olımpıadalyq aýylda sportpen shuǵyldanýǵa bar jaǵdaı jasalǵan. Fıtnes quraldarynyń 27 túri bar, jalpy esebi 139 trenajer qoldanysqa beriledi.
Fıtnes-ortalyq ta táýlik boıy jumys isteıdi. Budan bólek, sportshylar demalatyn oryn, kofehana, bank da ornalasqan.
Árbir olımpıadalyq aýylda 18 bólimshesi bar úlken aýrýhana jumys isteıtinin de aıta ketken jón. Eger sportshylardyń birinen koronavırýs anyqtalsa, ony "jedel járdemmen" basqa aýrýhanaǵa alyp ketedi.
Nysandarda sportshylarǵa betperde kıip, qolyn jıi jýyp, artyq áńgimelesýden aýlaq bolýdy eskertetin robottar bar.
Olımpıadashylarǵa arnalǵan as máziri 4 jyl boıy daıyndaldy. Qorytyndy mázirge 678 taǵam engen. Osy oraıda, biraz jaıt esepke alyndy: dıeta, dinı kózqaras jáne taǵy da basqa (vegeterıandyq as, halal tamaq). Árıne, as mázirinde dástúrli qytaı taǵamdary da bar.
Asqanadaǵy tamaq ishetin ydystar da ekologıalyq taza bolyp esepteledi. Pandemıaǵa baılanysty asqanada sportshylarǵa betperde men qolǵap, spırt jaǵylǵan maqta men sanıtaızerler beriledi.