Atalmysh shara Reseıdiń «Dongýz» polıgonynda ótti.
24 qyrkúıekte Shanhaı yntymaqtastyq uıymyna múshe memleketter áskerı kontıngentteri arasynda ótken «Beıbit mısıa-2021» birlesken áskerı terorızmge qarsy komandalyq-shtabtyq oqý-jattyǵýy aıaqtaldy, dep habarlaıdy Almaty-akhamy.kz.
«Qazaqstannyń áskerı kontıngenti «Batys» óńirlik qolbasshylyǵynyń barlaý-shabýyldaý rotasy, tank bólimshelerimen jáne ushqyshsyz basqarylatyn qurylǵylar eseptoptarymen birge zańsyz qarýlanǵan quralymdardyń shabýylyn tejeýdi, qarsy shabýylǵa shyǵýdy jáne shartty qarsylasty joıýdy pysyqtady», – delingen Qorǵanys mınıstrliginiń baspasóz qyzmetiniń habarlamasynda.
Urys áreketteri úsh kezeńde, bes operatıvti is-qımyl kórinisi retinde ótti. Birinshi kezeńde – jaǵdaıdy turaqtandyrý júrgizildi, sosyn aýdandy aqparattyq buǵattaý is-qımyly oryndaldy. Budan basqa, shartty qarsylastyń iri quralymdarynyń jaýyngerlik qabiletin tómendetý, sondaı-aq olardyń materıaldyq quraldary men oq-dáriler qoryn joıý sharalar kesheni iske asyryldy.
Ekinshi jáne úshinshi kezeńderde áskerı kontıngentter terrorlyq quralymdy toqtatý úshin shabýyl jasaý, qalǵan qaraqshy toptardy joıý jáne qaqtyǵystan keıingi retteý is-qımyldaryn júrgizdi.
Shanhaı yntymaqtastyq uıymyna múshe elder arasynda ótken «Beıbit mısıa-2021» birlesken áskerı terorızmge qarsy komandalyq-shtabtyq oqý-jattyǵýynyń tájirıbelik is-qımylyna Úndistan, Qazaqstan, Qytaı, Qyrǵyzstan, Pákistan, Reseı, Tájikstan jáne Ózbekstan Qarýly Kúshteriniń áskerı basqarý organdary, qurlyq áskerleriniń bólimsheleri jáne avıasıasy jumyldyryldy. Belarýs Respýblıkasynyń áskerı kontıngenti oqý-jattyǵýǵa alǵash ret qatysty.
