Halyqaralyq jastar kúni: Almatyda belsendi jastar marapattaldy
Almatyda Halyqaralyq jastar kúni men «Jastarmen birge» Ulttyq jastar onkúndigi aıasynda qalanyń belsendi jastarynyń qatysýymen BBQ formatynda kezdesý ótti, dep habarlaıdy aqshamnews.kz
İs-sharaǵa Almaty qalasy ákiminiń orynbasary Azamat Qaldybekov, komúnıtı ortalyqtarynyń basshylary, Almaty qalasy ákiminiń janyndaǵy jastar keńesiniń músheleri, ÚEU basshylary, eriktiler jáne belsendi jastar qatysty.
«Bul keshtiń ereksheligi jastarmen ashyq aspan astynda erkin formatta kezdesý boldy. Búgin jastar nebir jaqsy usynystar men jobalar usyndy. Men árqashan bizdiń jumysymyzǵa tyń serpin beretin jobalardy ashyq talqylaýǵa jáne qoldaýǵa daıyn ekenimdi jetkizgim keledi. Qalamyzdyń damýyna qosqan úlesterińiz úshin sizderge alǵys aıtamyn. Halyqaralyq jastar kúnimen quttyqtaımyn!» – dedi Almaty qalasy ákiminiń orynbasary Azamat Qaldybekov.
İs-shara barysynda jyl boıy qalamyzdyń qoǵamdyq ómiri men jastar saıasatynyń damýyna úles qosqan belsendi jastarǵa qala ákimi Erbolat Dosaevtyń atynan alǵys hattar tabys etildi.
«Almaty – jastar qalasy, sondyqtan bul merekeniń biz úshin mańyzy erekshe. Bizge erekshe kóńil bólinip, qoldaý kórsetilip jatqany qýantady. Búgin eń belsendi jastarǵa alǵys hattar tabys etildi. Kúsh-jigerimizdiń elenip, qoldaý taýyp jatqany bizdi odan ári yntalandyryp, damýǵa umtyldyrady. Osyndaı is-sharalar jıi ótkizilip tursa eken deımin», – dedi Almaty qalasynyń eriktisi Eldar Baıǵabylov.
İs-shara sońynda qatysýshylar tanysýǵa múmkindik alyp, uıymdastyrýshylar usynǵan dámdi taǵamdardan dám tatty.
«Jastarmen birge» Ulttyq jastar onkúndigi aıasynda 3-12 tamyz aralyǵynda qalada 50 myńnan astam jastyń qatysýymen 60-tan astam ártúrli formattaǵy is-shara ótti.
Atap aıtqanda, jastardyń open air «JAS FEST» festıvali, qala aýdandarynda ashyq aspan astynda ótken kınokórsetilimder, «ALMALY NIGHT» ıntellektýaldyq oıyny, «JasBol» fýtbol týrnıri jáne taǵy basqa is-sharalar uıymdastyryldy.