118-19 naýryzda Ózbekstan Respýblıkasy Prezıdentiniń kómekshisi Saıda Mırzıóeva Qazaqstanǵa jumys saparymen keldi. Almaty qalasynda ótken sapary barysynda QR Memlekettik keńesshisi Erlan Qarınmen kezdesti. Kezdesýde eki el arasyndaǵy mádenı-gýmanıtarlyq qarym-qatynastyń ózekti máseleleri talqylandy. Budan bólek, Saıda Mırzıóeva birneshe mádenı is-sharalarǵa qatysty. Ózbekstan Prezıdentiniń kómekshisi elimizge ekinshi ret jumys saparymen keldi. Alǵashqy saparyn 2024 jyly 6 tamyzda jasaǵan bolatyn.
Mádenı-gýmanıtarlyq baılanys nyǵaıa túspek
18 naýryzda QR Memlekettik keńesshisi Erlan Qarın elimizge jumys saparymen kelgen Ózbekstan Respýblıkasy Prezıdentiniń kómekshisi Saıda Mırzıóevamen Almatyda kezdesti. Onda taraptar mádenı-gýmanıtarlyq saladaǵy qarym-qatynas máselelerin jáne birlesken jobalar jaıly pikir almasty. Sondaı sátti jobalardyń biri «Zakovat» ıntellektýaldyq oıyny. 2024 jyly 6 tamyzda Astanada ıntellektýaldyq oıynnyń tanystyrylymy ótken bolatyn. Zıatkerlik oıynǵa jastar, oqýshylar qatysady.
Budan bólek, Erlan Qarın elimizde júrgizilip jatqan ózgerister, Ulttyq quryltaı jumysy jaıly aıtqan. Shynynda Qazaqstan men Ózbekstan arasynda odaqtastyq jáne strategıalyq áriptestik bir-biriniń tájirıbesin almasý arqyly bekı túsedi. Bir-birimizden alarymyz, úırener tustarymyz bar.
Sonymen qatar, taraptar «Ortalyq Azıa-EO» jáne Aral mádenı samıtterine daıyndyq máselelerin talqylaǵan. «OA-EO» samıti 2025 jyly 3-4 sáýirde Ózbekstannyń Samarqand qalasynda ótedi. Qazaqstannyń kópjaqty syrtqy saıasaty men Ózbekstannyń syrtqy saıasatynda aımaǵymyzdyń Eýropalyq odaqpen baılanysy mańyzdy ról atqarady. Sondyqtan kezdesýde keıbir máselelerde ortaq pozısıalar aıqyndalǵan shyǵar.
Aral mádenı samıti 2025 jyldyń 4–6 sáýirinde Ózbekstannyń Núkis qalasynda ótedi. Bul samıtti ótkizýge Ózbekstan bastama kótergen. Bıyl alǵash ret ótpek. Samıtti Ózbekstannyń mádenıet jáne ónerin damytý qory uıymdastyrýda. Samıt kórshi eldiń mádenı-gýmanıtarlyq salasyn álemge tanytý, Ortalyq Azıa men álem arasynda bul salada baılanysty nyǵaıtýǵa áser etpek.
Saıda Mırzıóevanyń Qazaqstanǵa jumys sapary barysynda Á.Naýaı atyndaǵy Ózbekstan memlekettik opera jáne balet Úlken teatrynyń «Lazgı. Tanes dýshı ı lúbvı» atty qoıylymy, sýretshi Oral Tańsyqbaevtyń keskindemelik jáne grafıkalyq jumystarynyń kórmesi ótti. Bul is-sharalar eki eldiń mádenı-gýmanıtarlyq saladaǵy baılanysyn nyǵaıta túsetini sózsiz.
Tutas aımaqtyń saıası mádenıti mańyzdy
Saıda Mırzıóeva 2024 jyly 6 tamyzda alǵash ret elimizge jumys saparymen kelgende áleýmettik jelide «Ózbekstandyq memlekettik qyzmetshige nege mundaı kóńil bólinýde?» degen suraq jıi qoıyldy. Bul suraqqa jaýap berip kóreıik.
Birinshiden, Ózbekstan Qazaqstannyń odaqtasy ári strategıalyq áriptesi. Eki el arasyndaǵy qarym-qatynas teńgerimdi jáne uzaq merzimge arnalǵan. Dıplomatıalyq qarym-qatynas 1992 jyly 23 qarashadan bastaý alady. Odan keıin birneshe mańyzdy qujattar qabyldandy. Atap óter bolsaq, 1998 jyly «Máńgilik dostyq týraly», 2023 jyly «Strategıalyq seriktestik týraly» jáne 2022 jyly «Odaqtastyq qatynastar týraly», «Memlekettik shekarany belgileý týraly» sharttarǵa qol qoıyldy.
Ekinshiden, Ózbekstan men Qazaqstannyń ǵana emes, tutas aımaqtyń saıası mádenıetin eskerý qajet. Biz kórshi eldiń ishki isine aralasa almaımyz. Qalaı ómir kerek ekeni jaıly aqyl da aıta almaımyz. Bul turǵydan Qytaıdyń syrtqy saıasaty bizge jaqyndaý. AQSH demokrattardyń kózqarastaryna uqsamaıdy. Sondyqtan ár memlekettiń ishki saıası erekshelikterin eskerýimiz qajet. Dıplomatıanyń zańy solaı.
Aımaqtyń saıasatynda tulǵa erekshe ról atqarady. Saıası ınstıtýttar joǵary deńgeıde damyǵanymen, tarıhtaǵy tulǵanyń rólin eshkim joqqa shyǵara almaıdy. Prezıdentter jáne ózge de saıasatkerlerdiń arasyndaǵy tulǵalyq qarym-qatynas aımaq elderi arasyndaǵy saıasatqa áser etedi.
Saıda Mırzıóeva Ózbekstannyń prezıdenti Shavkat Mırzıóevtiń úlken qyzy. 2023 jyly tamyzda prezıdenttiń kómekshisi laýazymyna taǵaıyndalǵan. Buǵan deıin Shavkat Mırzıóev Prezıdent ákimshiligi qurylymyna ózgeris engizgen. Jańa qurylym boıynsha Saıda Mırzıóeva aqparattyq saıasat, áleýmettik damý, bilim berý, jastar saıasaty sekildi mańyzdy salalarǵa jetekshilik etýde.
Úshinshiden, prezıdenttiń kómekshisi jetekshilik etetin salalar Ózbekstannyń ózine ǵana emes, eki el arasyndaǵy qarym-qatynasqa da oń áser etedi. Sebebi6 halyqtar arasyndaǵy baılanys mádenı-gýmanıtarlyq, áleýmettik qarym-qatynas jasaý arqyly nyǵaıady. Sondyqtan bul baǵyttaǵy jumys eki tarapqa da tıimdi.