Búgin, Almatydaǵy Eýrazıa ǵylymı-zertteý ınstıtýtynda ótken otyrysta baýyrlas túrik jurtynyń ulttyq ánurany qabyldanǵan tarıhı kún atalyp ótti.
Ári, tarıhı jyrǵa arqaý bolǵan Chanakkale qurbandary eske alyndy dep habarlaıdy Almaty-aqshamy.kz.
Budan 103 jyl buryn, 1921 jyly 12 naýryzda Ahmet Akıf Ersoıdyń «Táýelsizdik marshy» atty rýhty jyry Túrkıa Respýblıkasynyń ulttyq ánurany bolyp qabyldanǵan bolatyn. Túriktiń áıgili aqyny Ersoıdyń jyryna arqaý bolǵan Chanakkale oqıǵasy da osy tarıhı datamen birge baýyrlas túrik elinde eske alyp keledi.
Eýrazıa ǵylymı-zertteý ınstıtýynda ótken jıynǵa Túrkıa Respýblıkasynyń Almatydaǵy bas konsýly Evren Múdderısoǵlý qatysyp, el tarıhyndaǵy eleýli kún men tarıhı jyrǵa qatysty sóz sóıledi. Ol «Táýelsizdik marshy» túrik halqynyń maqtanyshy ekenin, onda halqynyń ótkeni men búgini jáne bolashaq arman-maqsaty beınelengenin tilge tıek etti.
Budan tys jıynǵa Ahmet Iassaýı ýnıversıteti qamqorshylar keńesiniń tóraǵasy Mýhıttın Shımshek, TÚRKSOI Jazýshylar odaǵynyń tóraǵasy Ulyqbek Esdáýlet, Eýrazıa ǵylymı-zertteý ınstıtýtynyń dırektory Sýat Beılýr, Alatau-Aqparat medıaholdınginiń dırektory Erjan Qalymbaıuly jáne ál-Farabı ýnıversıteniniń Shyǵystaný fakúlteti aǵa oqytýshysy Nurat İlıas qatysty.
Aqyn Ulyqbek Esdáýlet budan bir ǵasyrdan astam ýaqyt buryn jazylǵan tarıhı jyrda tutas túrki jurtyna ortaq poetıkalyq saryn men bıik sýretkerlik jatqanyn aıtyp ótti. Ári aqyn Ahmet Akıf Ersoıdyń óz dáýirindegi árbir túrik azamatynyń kóńilindegi aıtqysy kelgen sózdi tap basyp tapqan aqyndyq daryny týraly tereń tolǵanysyn jetkizdi.
Shyǵystanýshy Nurat İlıas Chanakkale oqıǵasyna qatysty tarıhı oqıǵalar týraly jáne Chanakkale jeńisiniń Orta Azıadaǵy túrki elderine qalaı áser etkeni týraly óz pikirimen bólisti. Sondaı-aq, túrki elderi arasyndaǵy qarym-qatynastyń ótkeni men búginine qatysty jańasha kózqarastarymen bólisti.