Qydyrǵalı Baıbekke eki is boıynsha aıyp taǵyldy.
Eks-sheneýniktiń ákesi QR ÁQBtK-niń 319-baby boıynsha aıyptalǵan, dep habarlaıdy Almaty-akshamy.kz
Biri zańsyz qurylysqa qatysty bolsa, ekinshi ruqsatsyz kásipkerlik tóńireginde.
Astananyń ákimshilik quqyq buzýshylyq jónindegi mamandandyrylǵan aýdanaralyq sotynda Almaty qalasynyń eks-ákimi Baýyrjan Baıbektiń ákesi Qydyrǵalı Baıbekke qatysty eki birdeı is qarastyrylyp jatyr.
Qydyrǵalı Baıbek QR ÁQBtK-niń 319-baby boıynsha aıyptalǵan. Bul bap boıynsha tıisti jer quqyǵynsyz óndiristik, turǵyn úı, sharýashylyq, gıdrotehnıkalyq (sý sharýashylyǵy) nemese turmystyq obektilerdi zańsyz salǵandar jaýapqa tartylady.
Osy aptada, beısenbide, Qydyrǵalı Baıbek atalmysh sotta taǵy bir istiń qaralýyn kútýde. Ol 29 maýsymda óndiriske qabyldandy. Birinshisinen aıyrmashylyǵy, sot prosesi onyń jeke qatysýymen ótýi tıis.
"ÁQBtK-niń 463-babynyń 1-bóliginde kózdelgen ákimshilik quqyq buzýshylyq jasaýda Baıbek Qydyrǵalı Muqametámirulyna qatysty ákimshilik quqyq buzýshylyq týraly is júrgizýge qabyldansyn. İsti qaraý úshin ákimshilik quqyq buzýshylyq týraly is boıynsha is júrgizýdiń barlyq qatysýshylaryn sotqa shaqyrý kerek", - delingen sot uıǵarymynda.
Bul bap boıynsha kásipkerlik nemese ózge de qyzmetpen aınalysýǵa, sondaı-aq tirkeýsiz, ruqsatsyz áreketterdi (operasıalardy) júzege asyrýǵa, sol sıaqty, eger bul áreketterde qylmystyq jazalanatyn is-áreket belgileri bolmasa, habarlamany tirkeý, ruqsat berý, jiberý mindetti bolǵan jaǵdaılarda habarlamany jibermegender jaýapqa tartylady.