Bul qyzmetten ol óz erkimen ketkenin málimdedi.
Nur Otan partıasy Tóraǵasynyń birinshi orynbasary bolǵan Baýyrjan Baıbek óz erkimen qyzmetten ketti. Bul týraly Baýyrjan Baıbek Facebook paraqshasynda jazdy, dep habarlaıdy Almaty-akshamy.kz.
Baýyrjan Qydyrǵalıuly partıanyń aldynda jańa mindetterdiń turǵanyn, osy kúnge deıin aýqymdy jumys atqarylǵanyn aıtty. "Al mindetterdi júzege asyrý úshin partıada qajettiniń bári – adamdar, tájirıbe, resýrstar jáne ınfraqurylym bar", - dedi ol.
«Sıeze el Prezıdenti, Nur Otan»partıasynyń jańadan saılanǵan Tóraǵasy Qasym-Jomart Kemeluly Toqaev partıany reformalaý, jumystyń ádisteri men mazmunyn jańartý, partıalyq baqylaýdy kúsheıtý, qoǵamdyq qabyldaýlardyń tıimdiligin arttyrý, kadrlyq áleýetti nyǵaıtý, sondaı-aq jańa formasıadaǵy adamdardy tartý jóninde naqty mindetter qoıdy», - dep jazdy ol Facebook paraqshasynda.
Osylaısha Baýyrjan Baıbek partıa basshylyǵy qyzmetinen óz erkimen ketý týraly ótinishin jazǵanyn, Tóraǵa ony maquldaǵanyn aıtty.
«Nur Otan aldyna jańa kózqarastar men tásilderdi talap etetin múlde jańa mindetter qoıyldy. Sondyqtan men partıa Tóraǵasy Qasym-Jomart Kemeluly Toqaevqa atqaryp otyrǵan qyzmetimnen bosatý týraly tıisti ótinishimdi berdim. Búgin meniń ótinishim qanaǵattandyryldy. Men memlekettik jáne partıalyq qyzmette 20 jyldan astam eńbek ettim: eki ret, jalpy alǵanda 6 jylǵa jýyq Nur Otan partıasy Tóraǵasynyń Birinshi orynbasary, 3 jylǵa jýyq Prezıdent Ákimshiligi Basshysynyń orynbasary laýazymdarynda, 4 jyl Almaty qalasynyń ákimi bolyp jumys istedim. Qandaı qyzmet atqarsam da, qaı salaǵa jaýapty bolsam da, men árqashan Otanymyzdyń Táýelsizdigin nyǵaıtýǵa, qoǵamda ishki saıası turaqtylyq pen kelisimdi qamtamasyz etýge, el azamattarynyń ál-aýqatyn arttyrýǵa ózimniń úlesimdi qosýǵa tyrystym. Óz jumysymda ashyqtyq jáne jaýapkershilik qaǵıdalaryn basshylyqqa aldym. Ar-namys, sózge beriktik jáne iske adaldyq degen uǵymdar men úshin árqashan birinshi orynda boldy», - dep jazdy Baýyrjan Baıbek.
Aıta ketsek, budan buryn Prezıdenttiń baspasóz hatshysy Berik Ýálı Facebook paraqshasynda Memleket basshysy Qasym-Jomart Toqaev Baýyrjan Baıbekke Nur Otan partıasy Tóraǵasynyń birinshi orynbasary laýazymyndaǵy kóp jylǵy jumysy úshin alǵys aıtty, dep habarlaǵan bolatyn.