Ota 2,5 saǵatqa sozyldy.
Ortalyq qalalyq klınıkalyq aýrýhana dárigeri, ortoped Qanat Táýekelov Qyzylordadan kelgen 34 jastaǵy turǵynnyń aıaǵyna kúrdeli operasıa jasady. Biregeı ota mindetti áleýmettik medısınalyq saqtandyrý paketi sheńberinde jasaldy, dep habarlaıdy Almaty-akshamy.kz Ortalyq klınıkalyq aýrýhananyń baspasóz qyzmetine silteme jasap.
Operasıa nátıjesinde pasıenttiń sol aıaǵy 5 santımetrge uzartylyp, aıaqtary teńestirildi.
Dárigerler pasıentke «Jambas súıeginiń týabitti kemistigi. 3-tıptegi CROWE» dıagnozyn qoıǵan. Ortoped mamannyń aıtýynsha, jigittiń oń aıaǵy sol aıaǵynan 6 sm uzyn bolǵan. Sondyqtan ol bala kúninen baldaqqa súıenip júrgen.
«Biz endoprotezdiń kómegimen sol jaq jambas súıegin tolyq aýystyryp, sol jaq jambasty anatomıalyq jaǵynan uzarttyq», - deıdi klınıkanyń ortopedıa bólimi meńgerýshisi Qanat Táýekelov.
Dárigerdiń sózine súıensek, jambas býynyn endoprotezdeý kezinde jambastyń basy, moıny men urshyq tolyǵymen jasandy protezge aýystyrylady.
«Mundaı jaǵdaıda jambas súıeginiń osteotomıasy dep atalatyn tásil jaqsy nátıje beredi. Ol aıaqtaǵy aqaýdy túzetip qana qoımaı, aıaqtyń qyzmetin de aıtarlyqtaı qalpyna keltirýge kómektesedi. Ota 2,5 saǵatqa sozyldy», - dep atap ótti Q.Táýekelov.
«MÁMS paketi arqyly osyndaı kúrdeli operasıalardy jasatýǵa bolady. Saqtandyrylǵan turǵyndar baǵasy qymbat bolyp keletin, joǵary tehnologıalardyń kómegimen jasalatyn qyzmet túrlerin qajetinshe paıdalana alady», - deıdi MSQ Almaty fılıaly dırektory Tileýhan Ábildaev.
