Qazirgi ýaqytta respýblıkalyq mańyzy bar joldardyń barlyq ýchaskeleri qalpyna keltirildi
Qazirgi ýaqytta 99 turǵyn úıdi sý alý faktisi tirkeldi. Buǵan deıin saǵat 13.00-degi jaǵdaı boıynsha, BQO-nyń 172 úıi sý astynda qalǵany týraly aqparat berilgen bolatyn, komısıalyq tekserýlerden keıin 99 úı sý astynda qalǵany anyqtalyp, naqtylandy, dep habarlaıdy Almaty-akshamy.kz.
QR TJM baspasóz qyzmetiniń málimetinshe, Aqmola jáne Qaraǵandy oblystaryndaǵy jergilikti mańyzy bar avtojoldardyń eki ýchaskesinde sý tasqyny boldy. BQO-daǵy Jánibek aýdany Jaqsybaı eldimekenin sý basý saldarynan 108 bas mal qyryldy.
"Sý tasqyny kezeńi bastalǵannan beri segiz eldimekende 184 turǵyn jáne 15 saıajaı úıleri, eki áleýmettik nysan qyzyl sýdyń astynda qaldy. Pavlodar jáne Aqtóbe oblystaryndaǵy 43 úıden sý buryldy. 841 adam aldyn ala evakýasıalandy, onyń ishinde 430-y ýaqytsha evakýasıalaý pýnktterinde, 411-i týysqandaryna ornalastyryldy. Sý basqan 141 turǵyn jáne 15 saıajaı úıleri baqylaýda",-delingen habarlamada.
Quzyrly vedomstvo málimetinshe, tas joldarda barlyǵy 24 sý tasqyny tirkeldi, onyń ishinde respýblıkalyq mańyzy bary – tórteý, oblystyq - ekeý, jergilikti – 18, onyń ishinde tas joldyń 14 ýchaskesi shaıyldy: respýblıkalyq – bireý, jergilikti – 13.
«Qazirgi ýaqytta respýblıkalyq mańyzy bar joldardyń barlyq ýchaskeleri qalpyna keltirildi, oblystyq jáne jergilikti mańyzy bar 14 ýchaskede sý tasqyny saqtalady. Óńirler aýmaǵynda sý tasqynynan týyndaǵan TJ táýekelderin tómendetý maqsatynda JAO jáne TJM kúshterimen 719,65 myń tekshe metr qar sýyn sorý, ınertti materıaldary bar 24 191 qap tóseý, sondaı-aq 250 sharshy metr alańda ózenderde muz kesý jumystary júrgizildi. Sý tasqynyna qarsy jumystarǵa TJM, İİM jáne JAO-nyń 944 adamy, 360 tehnıkasy, 40 sý sorǵysh quraly jáne TJM-niń segiz júzý quraly jumyldyryldy»,-delingen habarlamada.
Vedomstvo málimetinshe, 2 sáýirde BQO-da sý tasqyny jaǵdaıynyń kúrdelenýine baılanysty Mańǵystaý oblysynan TJM qutqarý bólimsheleriniń toby jiberildi, jeke quramnan 43 adam, tórt tehnıka, eki júzý quraly jáne alty motopompa berildi, olar oblystyń Tasqala jáne Syrym aýdandarynda jumyldyryldy.
BQO-nyń Jánibek aýdanyna shuǵyl sharalar qabyldaý úshin Atyraý oblysynyń Tótenshe jaǵdaılar departamenti MI-8 tikushaǵymen qutqarýshy top attandy.
«Qazgıdromet» RMK derekteri boıynsha aldaǵy táýlikterde Aqmola, Aqtóbe, SHQO, BQO, Qaraǵandy, Qostanaı, Pavlodar, SQO jáne Nur-Sultan qalalarynda jańbyr men qar túrindegi azdaǵan jaýyn-shashyn túsedi dep kútiledi.
Ǵaryshtyq monıtorıń derekteri boıynsha, qar jabyndysy bar alań - 40%-dan az, qar qorynyń basym bóligi elimizdiń ortalyq jáne soltústik óńirlerinde baıqalady.